Manastirliu: Aksion për pastrimin e territoreve të spitaleve në bashkëpunim me IKMT
Ministrja e Shëndetësisë: Konkurs për drejtorët e rinj
Ministrja
e Shëndetë sisë, Ogerta Manastirliu deklaroi dje, se do të shemben të gjitha ato ndërtime brenda territoreve të spitaleve që nuk kanë lidhje me aktivitetet shëndetësore. "Jam sot këtu, për të shpallur aksionin mbarëkombëtar të qeverisë shqiptare, për çlirimin e hapësirave në brendësi të mjediseve spitalore, në të gjithë territorin e vendit. Angazhimi ynë është që brenda 100 ditëve, hapësirat e jashtme të të gjitha spitaleve dhe qendrave shëndetësore, të pastrohen nga çdo ngrehinë apo aktivitet tjetër që nuk ka lidhje me veprimtarinë e përditshme të këtyre strukturave shëndetësore", - tha Manastirliu. Ky aksion për prishjen e objekteve pa leje do të kryhet nga Inspektorati Kombëtar për Mbrojtjen e Territorit. Më tej ajo theksoi vendosmërinë e ministrisë që ajo drejton, për t'i shkuar deri në fund aksionit. "Ne jemi të palëkundur në vendosmërinë tonë, për të pastruar një herë e mirë spitalet dhe qendrat shëndetësore nga aktivitete dhe ndërtime që jo vetëm nuk kanë kurrfarë lidhjeje me to, por më keq akoma, në shumë raste pengojnë veprimtarinë e tyre, duke u kthyer në një faktor që dëmton ndjeshëm cilësinë e shërbimit për qytetarët", - theksoi ministrja e Shëndetësisë. Gjithashtu, Manastirliu bëri me dije dhe hapjen e konkursit për përzgjedhjen e drejtorëve të rinj të spitaleve, të cilëve para pak kohësh iu kërkua dorëheqja nga kryeministri Rama. "Në bashkëpunim me 17 drejtuesit e rinj të spitaleve rajonale e universitare në gjithë vendin, që do të zgjidhen përmes një konkursi publik që ne do të kryejmë brenda një afati 35- ditor duke nisur nga sot, ne do vëmë në zbatim planin tonë për transformimin e tyre në institucione të denja të trajtimit shëndetësor", - ka thënë ministrja.