Plagoset me thikë në qafë efektivi i policisë në Kamëz, arrestohet autori
20- vjeçari: Nuk e njoh policin. Dëshmitarët: Të riut iu kërkua të kishte kujdes për të kaluar rrugën Ramadan Marku dyshohet të ketë probleme mendore
Një punonjës policie ka mbetur i plagosur me thikë, pasi në rrethana ende të paqarta u qëllua nga një kalimtar i rastit, i cili dyshoshet të jetë me probleme mendore. Ngjarja u shënua mesditën e djeshme në Kamëz, ku i plagosur ka mbetur efektivi Zef Prendi. Ky i fundit mori një plagë në qafë dhe fatmirësisht ndodhet jashtë rrezikut për jetën, ndërsa vetëm disa minuta pas ngjarjes, policia bëri të mundur vënien në pranga të të dyshuarit. Zyrtarisht, policia tha se i arrestuari është 20vjeçari Ramadan Marku. Ngjarja u shënua teksa 50vjeçari ishte i planifikuar me shërbim ( patrullë këmbësore) tek rreth- rrotullimi i Bathores. Pas vënies në pranga të 20- vjeçarit, i cili është person me precedent të mëparshëm penal, policia nisi menjëherë hetimet për zbardhjen e plotë të rrethanave. I riu ka pohuar se nuk ka asnjë njohje apo konflikt me efektivin e plagosur, ndërsa ka shtuar më tej se nuk i kujtohej se si kishte ndodhur ngjarja. Të njëjtën gjë ka pohuar edhe punonjësi i policisë, i cili ka thënë se nuk ka pasur asnjë konflikt me të riun. Ndërkaq, dëshmitarët në vendin e ng- jarjes pohuan se në momentin që i riu kishte tentuar të kalonte nga njëra anë e rrugës në tjetrën, është këshilluar nga polici që të kishte kujdes.
Ka qenë ora 11: 40 minuta kur punonjësi i policisë u qëllua me thikë në qafë nga 20- vjeçari Ramadan Marku. Pasi kreu krimin, ky i fundit u largua menjëherë prej andej për t'u kapur vetëm pak minuta më vonë. Me të marrë njoftimin, forca të shumta policie i shkuan në ndihmë kolegut të tyre, ndërsa nisën punën për zbardhjen e rrethanave. Fillimisht, hetuesit kishin dyshime ngjarja në fjalë ndodhi për shkak të detyrës që efektivi Zef Prendi ishte duke kryer tek rreth- rrotullimi i Bathores, por pasi bënë identifikimin e autorit, burimet thanë se i dyshuari mund të jetë person me probleme mendore. Sipas dëshmitarëve okularë, i riu kishte tentuar të kalonte rrugën, por për shkak të lëvizjes së shumtë të mjeteve, efektivi i kishte kërkuar që ai të tregonte kujdes. Pas kësaj, 20vjeçari ka nxjerrë nga xhepi një thikë dhe e ka qëlluar atë në qafë. Në vendin e ngjarjes policia gjeti edhe armën e krimit. Për uniformat blu, Ramadan Marku njihet si një person që ka pasur konflikte me disa persona në këtë zonë, ndërsa më herët ka qenë i arrestuar edhe për një plagosje. Aktualisht, policia është duke pritur edhe raportin mjeko- ligjor për 20vjeçarin për të hedhur dritë nëse ai vuan ose jo nga çrregullimet mendore.