Digjet makina e kryebashkiakut demokrat të Lezhës, Fran Frrokaj
Bashkia: Mjeti ishte marrë me kontratë huapërdorjeje, të zbardhet ngjarja "Ngjarja besoj se është e qëllimshme"
Digjet në mesnatë au tomjeti i Bashkisë së Lezhës, i cili përdorej nga kreu i këtij institucioni, Fran Frrokaj, si dhe një tjetër mjet i parkuar pranë tij. Ngjarja u shënua rreth orës 00: 45 në lagjen "Beslidhja" të këtij qyteti. Mësohet se dy automjetet ishin të parkuar pranë njëri- tjetrit në parkingun e një pallati. Burime zyrtare të policisë bënë me dije se si pasojë e zjarrit është përfshirë nga flakët automjeti tip "Mercedes ML" me targë AA 400 JK, i cili është në pronësi të shtetases me iniciale Sh. P., e marrë me qira nga Bashkia e Lezhës dhe në përdorim nga kryetari i bashkisë. Po ashtu, nga flakët u përfshi edhe mjeti tjetër i parkuar, tip "Mercedes Benz", me targë LE 7495, në pronësi të shtetasit me iniciale K. Ll. Mësohet se kanë qenë banorët e zonës, të cilët sapo kanë konstatuar flakët e zjarrit, kanë lajmëruar menjëherë policinë. Uniformat blu të mbërritura në vendin e ngjarjes nisën punën për të zbuluar shkaqet e rënies së zjarrit. "Nga veprimet e para hetimore, rezulton se janë përfshirë nga flakët dy automjete të parkuara afër njëra- tjetrës dhe konkretisht: automjeti "Mercedes" fuoristradë ML me targë AA 400 JK në pronësi të shtetases Sh. P. dhe në përdorim nga shtetasi F. F., si dhe mjeti "Mercedes Benz" me targë LE 7495 E në pronësi të shtetasit K. Ll", thuhet në njoftimin zyrtar të policisë. Ndërkaq, pas ngjarjes së ndodhur, Bashkia Lezhë me anë të një deklarate bën me dije se automjeti i djegur ishte marrë me kontratë huapërdorjeje për shkak se institucioni nuk kishte në pronësi makinë për lëvizjen e kryetarit apo administratës. Nga ana tjetër, kryebashkiaku demokrat i Lezhës, Fran Frrokaj ka pohuar në polici se ka dyshime se djegia e mjetit që ai përdorte mund të ketë qenë e qëllimshme. Ndërkaq, policia ka marrë disa deklarime si dhe janë duke bërë këqyrjen e kamerave të sigurisë të vendosura përgjatë rrugës dhe në afërsi të vendit të ngjarjes, me qëllim sqarimin e plotë të rrethanave të rënies së zjarrit. Priten hetimet edhe nga eksperti piroteknik për të përcaktuar shkakun e rënies së zjarrit.
KRYEBASHKIAKU FRAN FRROKAJ
Kreu i Bashkisë së Lezhës reagoi dje në lidhje me djegien e mjetit, i cili përdorej prej tij. Gjatë marrjes në pyetje, ai u tha hetuesve të çështjes se nuk e përjashton mundësinë se zjarrvënia të ketë qenë e qëllimshme. "Mjeti ka qenë i fikur, nuk besoj se ka pasur defekt. Besoj se zjarrvënia ka qenë e qëllimshme. Mjeti përdorej nga unë, por është i bashkisë", mësohet të ketë thënë Fran Frrokaj në polici.
BASHKIA LEZHË
Teksa pritet përfundimi i hetimeve për të zbardhur shkaqet e djegies se mjetit. Bashkia Lezhë u bën thirrje organeve të hedhin dritë mbi këtë rast nëse ishte zjarrvënie e qëllimshme apo defekt në automjet. "Bashkia Lezhë sqaron opinionin publik se automjeti i djegur autoveturë, tip ' Mercedez Benz' me targa AA 400 JK, prodhim i vitit 2002, ishte marrë nga bashkia me kontratë huapërdorjeje për shkak se nuk kishte në pronësi makinë për lëvizjen e kryetarit apo administratës. Bashkia Lezhë po pret përfundimin e heti- meve për të zbardhur shkaqet e djegies, ndërsa u bën thirrje organeve kompetente për të hedhur dritë mbi këtë rast, nëse ishte zjarrvënie e qëllimshme apo defekt në automjet", shkruhet në njoftimin e Bashkisë së Lezhës.