Nis rikonstruksioni i shkollës "Dora d'Istria", mësim vetëm me një turn

Erion Veliaj: Kërkoj bashkëpunim nga prindërit

Ditën

e djeshme ka nisur rikonstruksio ni i plotë i shkollës 9- vjeçare "Dora d'Istria" në kryeqytet. Kryebashkiaku Erion Veliaj gjatë inspektimeve të punimeve në këtë ndërtesë u shpreh se falë projektit që po zbatohet, kësaj shkolle do t'i shtohen edhe 11 klasa të reja, si dhe do të ketë një sistem ngrohjeje në të gjithë godinën. Gjithashtu, pas mbarimit të rikonstruksionit, nxënësit e kësaj shkolle do të kenë mundësinë që të zhvillojnë mësimin vetëm me një turn. "Më vjen mirë që tek ish- shkolla ime, që dikur mbante emrin ' 20 Dhjetori', sot ' Dora d'Istria', po bëjmë jo vetëm një rikonstruksion total të godinës, por po shtojmë edhe 11 klasa të reja, për të futur konceptin parashkollor dhe për t'i dhënë fund mësimit me dy turne", tha Veliaj. Ai theksoi se deri në fund të mandatit të tij, problemi i mësimit me dy turne do të marrë fund. Ndërkaq, kryebashkiaku u bëri thirrje prindërve për më tepër bashkëpunim për anomalitë që mund të krijohen nga transferimi i nxënësve të kësaj shkolle në shkollat e tjera deri në përfundimin e punimeve. "Kërkoj mirëkuptim prindërve teksa po bëjmë mësim në shkollat alternative, se në një periudhë prej pak muajsh do të kemi totalisht të rikonstruktuar shkollën ekzistuese plus klasat e reja, që zgjidhin të gjithë këtë anomali që kemi pasur në Njësinë 10. Ashtu si edhe në Njësinë 8, edhe në disa njësi të tjera të Tiranë i kemi dhënë fund mësimit me dy turne, gradualisht në të 24 njësitë do të vazhdojmë me këtë ritëm për t'u siguruar që fundi i këtij mandati na gjen të sistemuar. Ne mund të kemi debate të tjera në zgjedhjet e ardhshme, por jo debatin e shkollave me dy turne", tha Veliaj. Momentalisht në shkollë po bëhen instalimet për të rritur dhe përmirësuar mirëfunksionimin e të gjitha ambienteve për nxënësit dhe mësuesit. Gjithashtu, do të bëhen një sërë punimesh të tjera, si ndërrim i dyerve dhe dritareve, instalimet elektrike dhe hidraulike, rikonstruksion i gjithë nyjave sanitare si dhe izolimi i tarracës.