Vasili: Qeveria kërkon të bllokojë vetingun me shkurtimet në fonde
Grupi parlamentar i LSI- së bën gati amendamente në seancë
Grupi
parlamentar i LSI- së vendosi dje që të propozojë amendamente për mbështetjen e organeve të vetingut. Pas mbledhjes, kryetari i grupit, Petrit Vasili u shpreh për mediat se, "nuk mund të pajtohemi dhe shkurtimet drastike që qeveria i ka bërë në mënyrë krejtësisht të paarsyeshme dhe me qëllim bllokimin të këtij procesi dhe për qëllime që ajo i di, por që sigurisht nuk janë qëllime të mira. Kemi vendosur që të paraqesim amendamente, që reflektojnë pikë për pikë ato kërkesa që vetë këto institucione kanë bërë për fonde dhe për personel për të siguruar funksionimin korrekt dhe normal të tyre, shkurtimet drastike të bëra atje janë në kontrast shumë të madh me shtesat gjigante që qeveria bën për të stimuluar parazitizmin dhe manipulimin e opinionit publik nëpërmjet punonjësve fiktivë, ose atyre që nuk kanë punë të vërteta dhe reale, por janë thjesht komentues të rëndomë, ndërkohë që këto organe jetike të vetingut vuajnë dhe do të vuajnë për personel", u shpreh Vasili. "Pra, qëndrimi është që do të paraqesim amendamente, të cilat shpresojmë shumë që qeveria të reflektojë dhe t'i votojë, të cilat nuk do të jenë asgjë më shumë dhe asgjë më pak sesa propozimet që këto organe të vetingut kanë bërë për funksionimin normal të tyre", sqaroi Vasili. Po ashtu, Vasili njoftoi edhe qëndrimin "pro" të LSI- së për dekretin e kthimit të ligjit të mbetjeve, kur të diskutohet të enjten në seancë plenare. LSI do të votojë po ashtu kundër aktit normativ të qeverisë për buxhetin. Më herët Vasili shkroi në "FB" se, "ky kryeministër duhet sqaruar, që megjithëse ai e do për vete, vetingu është i pavarur dhe jo pronë e tij".