Histori- Filologjia: 1030 kuota të lira në master
Aplikimet për ciklin e dytë të studimeve në 4- 10 tetor, kriteret për t'u shpallur fitues Ja dokumentacioni që duhet të dorëzoni
Fakulteti i Historisë dhe i Filologjisë bën me dije se në datat 410 tetor do të hapen aplikimet për programet e studimit të nivelit të dytë master. "Gazeta Shqiptare" publikon sot, kuotat e lira në degët përkatëse për të gjithë kandidatët që dëshirojnë të aplikojnë. Të gjithë studentët e interesuar kanë në dispozicion 1030 kuotat e lira që ofron ky fakultet në degët e tij për ciklin e dytë të studimeve me kohë të plotë "Master i Shkencave" dhe "Master Profesional". Gara e përzgjedhjes së fituesve do të zhvillohet nëpërmjet konkurrimit me dosje dhe kandidatët duhet të kenë kujdes që të dorëzojnë dokumentet brenda datës 10 tetor, në të kundërt humbasin mundësinë e studimit në këtë cikël. Për vitin akademik 2017- 2018 janë miratuar 640 kuota në programet e nivelit profesional dhe 390 të tjera në programet e nivelit shkencor. Shpallja e fituesve do të bëhet në datën 13 tetor të këtij viti. Të gjithë kandidatët që do të kenë pakënaqësi, mund të procedojnë me ankimim në datat 13- 16 tetor, ndërsa regjistrimi i fituesve në nivelin e dytë të studimeve master do të bëhet në datat 17- 20 tetor.
DOKUMENTACIONI
Në këtë cikël të dytë studimesh kanë të drejtë të aplikojnë të gjithë studentët që janë pajisur me diplomën e nivelit Bachelor nga një universitet publik ose ata që janë diplomuar jashtë vendit por kanë bërë njësimin e diplomës në MAS. Gjithashtu, kanë të drejtë të aplikojnë kandidatët që kanë përfunduar studimet në një program të integruar të ciklit të dytë, që rezulton i akredituar në momentin e diplomimit. Nga Fakulteti i Historisë dhe i Filologjisë theksohet fakti se kandidati duhet të paraqitet personalisht në sekretarinë mësimore përkatëse dhe të dorëzojë dosjen e dokumenteve brenda afatit. Në këtë dosje ata duhet të kenë: diplomën ose fotokopjen e noterizuar për studimet e përfunduara në ciklin e parë, diplomën e Maturës Shtetërore së bashku me listën e notave, ose fotokopjen e tyre të njësuar me origjinalin. Për diplomat e marra jashtë Shqipërisë duhet të dorëzohet vërtetimi i njohjes së saj nga Ministria e Arsimit, e shoqëruar me fotokopje të diplomës së njësuar me origjinalin. Ndërkaq, të gjithë ata aplikantë që e kanë përfunduar shkollën e mesme para vitit 2010, duhet të dorëzojnë origjinalin e Dëftesës së Pjekurisë, e në rast se nuk e kanë këtë dokument, duhet të paraqesin fotokopje të saj të lëshuar nga drejtoria e shkollës së mesme dhe të konfirmuar nga njësia përkatëse arsimore.
MASTER SHKENCOR
Në bazë të kritereve të përcaktuara nga Universiteti i Tiranës, për të aplikuar në degët e programit të studimit "Master Shkencor", çdo kandidat duhet të ketë një diplomë të nivelit Bachelor të ngjashme me fushën e studimeve që kërkon të ndjekë në këtë cikël studimesh, mesatarja duhet të jetë mbi notën 7, dhe të dëshmojë nëpërmjet dokumentit përkatës, njohjen e të paktën nivelit B1 të një prej pesë gjuhëve të huaja të BEsë: anglisht, frëngjisht, italisht, spanjisht, gjermanisht; kjo bazuar në kriteret e universitetit përkatës.
MASTER PROFESIONAL
Kandidatët që do aplikojnë në programet e studimit "Master Profesional" nuk do e kenë të nevojshme njohjen e gjuhës së huaj, dhe theksohet se mesatarja e konkurrimit duhet të jetë mbi notën 6. Ashtu si në Masterin Shkencor, kandidatët duhet të dorëzojnë dosjen e dokumenteve brenda datës 4 tetor të këtij viti. Përfaqësues nga fakulteti i Historisë dhe Filologjisë në Universitetin e Tiranës bëjnë me dije se afati i fundit i aplikimeve është data 10 tetor, e pas 3 ditësh komisioni i ekspertëve do të shpallë listën paraprake të fituesve që përmbushin kriteret për vazhdimin e studimeve në programet e ciklit të studimeve të nivelit të dytë.