Rikonstruktohet shkolla 9- vjeçare "Siri Kodra", përfitojnë 600 nxënës
Veliaj: Prioritet cilësisë në mësimdhënie
Shkolla
9- vjeçare "Siri Kodra" ka hapur dyert për rreth 600 nxënësit e saj me ambiente plotësisht të rikonstruktuara. Kryebashkiaku Erion Veliaj ka përuruar dje mjediset e reja të shkollës, duke theksuar se, krahas përmirësimit të infrastrukturës, është bërë një punë intensive mbi përzgjedhjen e mësuesve më të mirë, duke garantuar në këtë mënyrë edhe cilësi në mësimdhënie. "Me rikonstruksionin e plotë të shkollës ' Siri Kodra' u japim fund përfundimisht të gjitha problematikave që kemi pasur me institucionet arsimore, çerdhe, kopshte, shkolla në Njësinë 8. Kjo na liron që të orientohemi më shumë drejt zonave rurale apo në zonat ku ka pasur një degradim të institucioneve arsimore", - tha Veliaj. Ai ftoi prindërit që të dërgojnë fëmijët e tyre në shkollat e reja të hapura këtë vit, duke lehtësuar në këtë mënyrë edhe mbingarkesën nëpër klasa. Duke e cilësuar të suksesshme hapjen e shkollave të reja dhe rikonstruksionin masiv të atyre ekzistuese, kryebashkiaku u shpreh se me investimet e reja është zgjidhur edhe problemi i ngrohjes nëpër shkolla, i cili nuk ka ekzistuar ose ka qenë degraduar si pasojë e mosvënies dorë për vite me radhë. "Jam shumë mirënjohës që Tirana doli faqebardhë në këtë fillim të vitit të ri shkollor dhe fokusin kësaj here e kemi pasur tek infrastruktura, që u paraprin ditëve të dimrit, ndaj dhe investimet më të mëdha kanë qenë në sistemet e ngrohjes dhe në sistemet sportive, gjithashtu për të fuqizuar rolin që ka sporti. Jo detyrimisht për t'u bërë të gjithë sportistë elitare, por për të futur kulturën e një jete të shëndetshme në një qytet që gjithmonë e më shumë ka probleme me obezitetin dhe me shëndetin e fëmijëve që në moshë të vogël", - deklaroi Veliaj. Ndërhyrja për rikonstruksionin e plotë të shkollës 9- vjeçare "Siri Kodra", konsistoi në sistemimin e të gjitha linjave elektrike, hidraulike, nyjeve higjieno- sanitare, si dhe rehabilitimin e palestrës. Gjithashtu, është realizuar rilyerja e fasadës dhe sistemimi i ambienteve të jashtme.