Legalizimet, 1.435 personat që kanë gati lejet e legalizimeve

Dosja për marrjen e tapisë dorëzohet nga Agjencia e Legalizimeve në Hipotekë ALUIZNI: Ja kush përfiton në Kamëz dhe Vorë

ALUIZNI publikon listën me 1.435 per sona që kanë ndërtuar pa leje dhe kanë gati lejen e legalizimit. Përfituesit janë në qarkun Tiranë, në zonën e Kamzës dhe në Vorë. Drejtoria e ALUIZNI- t njofton qytetarët se duhet të paraqiten pranë zyrave të ALUIZNI- t në Kamzë dhe Vorë për të tërhequr lejen ndërtimore. Ndërkohë që, procedurat për marrjen e tapisë do të ndiqen nga ALUIZNI, i cili dorëzon dosjen e plotë në Hipotekë. Kjo drejtori në një kohë rekord ka mbyllur gjithë procesin për 1.435 dosjet, të cilat tani kanë gati lejen dhe për pak ditë marrin certifikatën e pronësisë. Menjëherë pas regjistrimit të certifikatës së pronësisë, përfituesit do të njoftohen për tërheqjen e saj. Pas ndryshimeve të fundit ligjore, qytetari do të marrë një kopje për të vërtetuar mbarimin e procesit të legalizimit, por gjithë procedura vijuese për regjistrimin në Zyrën e Regjistrimit të Pasurive të Paluajtshme do të bëhet nga Agjencia. Ndërkohë që, sipërfaqja e parcelës, për të cilën miratohet kalimi i së drejtës së pronësisë, nuk mund të jetë më e madhe se trefishi i sipërfaqes së bazës së ndërtimit, dhe për ndërtimet pa leje me funksion banimi jo më shumë se 500 m ² . Sipërfaqet mbi masat e përcaktuara në këtë pikë, të cilat, për shkak të përmasave ose konfiguracionit nuk mund të shfrytëzohen më vete për ndërtim, i shiten poseduesit të ndërtimit pa leje sipas vlerës së pronës, të miratuar me vendim të Këshillit të Ministrave, vetëm nëse ka shpre- hur më parë vullnetin, nëpërmjet një kërkese me shkrim. Gjithsej, leje legalizimi të dhëna në periudhën 2006- 2015 janë 57.000. Me ndryshimet që pësoi ligji nr. 9482/ 2006 në vitin 2014 dhe 2015 dhe me miratimin e kuadrit të plotë të akteve nënligjore, u bë i mundur përshpejtimi i ritmeve të procesit të legalizimit, duke mundësuar legalizimin e 15.294 ndërtimeve në vitin 2014 dhe 19.714 të tjerave për periudhën janar- 26 tetor 2015. Sipas ligjit në fuqi, kur ndërtimi pa leje disponohet nga një subjekt, kontrata e kalimit të pronësisë së parcelës ndërtimore dhe objektit që legalizohet regjistrohen në emër të subjektit që disponon objektin. Ndërsa, në rastin kur ndërtimi pa leje disponohet nga më shumë se një person fizik ose juridik, regjistrimi i pjesëve takuese mbi pasuritë ( parcelë dhe objekt) kryhet: në pjesë të pandara, ideale, sipas numrit të subjekteve; në pjesë takuese të ndara, sipas marrëveshjes së nënshkruar ndërmjet subjekteve lirisht dhe të depozituar brenda afatit të vetëdeklarimit. Subjektet mund të përcaktojnë, përveç pjesës takuese, edhe pjesët fizike respektive nëse ndërmjet tyre përputhet vullneti.