Pagat e "vetingut", Ferhati: Komisionerët publikë do të marrin mbi 3 milionë lekë
Deputetja
e PS- së, relatorja për organet e rivlerë simit të vetingut në Komisionin e Ligjeve, Klotilda Ferhati, foli dje për shkurtimet që iu bënë organikës së institucioneve të reja të vetingut. Në studion e emisionit "Kjo javë", me gazetaren Nisida Tufa në "News24", Ferhati tha se nga strukturat e organeve të vetingut nuk janë bërë shkurtime që prekin përmbajtjen e këtyre organeve. "Është riorganizuar pjesa e shërbimeve mbështetëse, administrative, ku janë hequr nga këto struktura një numër shoferësh. Ato po u jepen si shërbime Gardës së Republikës, pasi këtyre anëtarëve të organeve të vetingut u garantohet edhe siguria. Rreth 22 shoferë kanë ikur nga këto struktura, dhe do të jepen te Garda. Pra janë zhvendosur. Pjesa tjetër e stafit të shkurtuar, pasi ne miratuam 113 punonjës në total nga 185 që u kërkuan, pjesa tjetër ka të bëjë me rikonceptim të funksioneve mbështetëse, që kanë të bëjnë me shërbime, financë, sekretari, protokoll, të cilat janë rikonceptuar si shërbime. Pra të mos kemi struktura të fryra", - tha Ferhati. Duke folur për pagat, ajo pohoi se "për komisionerët e Komisionit të Pavarur të Kualifikimit dhe për komisionerët publikë është rreth 3 mln e ca lekë, pasi ata marrin pagën e gjyqtarëve të Gjykatës së Lartë, ndërsa për Kolegjin e Posaçëm të Apelimit është diçka më shumë, mbi 3.2 mln lekë të vjetra, sepse kjo pagë llogaritet duke iu referuar pagës së gjyqtarit të Gjykatës Kushtetuese". E pyetur në lidhje me akuzat e kryetares së LSI- së se drejtësia është e kapur, Ferhati tha se "argumenti i kapjes së drejtësisë, më duket argumenti më qesharak për strukturën e vetingut".