Qytetarët që nuk tërheqin kuponin tatimor do të gjobiten
Detaje si do të koordinohet puna e Tatimeve, Doganave dhe Inspektoratit të Punës Faza III/ Nesër nis aksioni në terren kundër informalitetit
Sot nis aksionit "anti- in formaltitet III". Në fokus nuk do të jenë vetëm bizneset, por edhe konsumatorët. Çdo qytetar para se të dalë nga dyqani duhet të jetë i pajisur me kuponin tatimor. Në rast të kundër do të gjobitet me 1 mijë lekë. Inspektorët tatimorë do të dalin në terren dhe do të presin blerësit për të verifikuar marrjen e kuponit. Skema bëhet e ditur nga burime zyrtare pranë Drejtorisë së Përgjithshme të Tatimeve, të cilat bëjnë të ditur se duke filluar nga 1 tetori, kur nis dhe faza e tretë anti- informalitet nuk duhet të bëjnë kujdes vetëm bizneset, por edhe qytetarët. "Qytetarët do kontrollohen, kanë detyrim ligjor të tërheqin kuponin. Në momentin që qytetarët nuk e tërheqin kuponin sigurisht që ka dhe penalitet që është 1 mijë lekë për ata që thyejnë ligjin. Ne do i inkurajojmë të jenë pjesë e këtij aksioni. Jo gjithmonë do hyjmë direkt në ambientin e biznesit, por do pyesim një qytetar që sapo ka marrë një shërbim në atë njësi, i cili më tej mund të jetë dhe objekt i kontrollit. Janë skema që përdoren në gjithë botën, ka punonjës të administratës tatimore, por jo vetëm, që hyjnë në një aktivitet. Qëllimi është jo të penalizojmë qytetarin, por të jetë pjesë e aksionit dhe palë me administratën tatimore",- bëjnë të ditur burimet zyrtare nga tatimet.
AKSIONI
Aksioni kundër informalitetit "zbret" në terren ditën e nesërme, më 1 tetor. Lajmi u dha pak ditë më parë nga ministri i Financave dhe i Ekonomisë, Arben Ahmetaj, i cili deklaroi se do të ketë një koordinim nga të gjitha strukturat si Tatimet, Doganat dhe Inspektorati i Punës. "Nga data 1 tetor 2017 fillojmë aksionin në terren. Ky është mandati i anti- informalitetit, do të kemi koordinim të të gjithë strukturave: Tatimet, Doganat dhe Inspektorati i Punës. Krahas aksionit kundër informalitetit, ndërmarrim një tjetër reformë të rëndësishme për lehtësimin e shërbimeve dhe reduktimin e burokracisë për sipërmarrjen dhe qytetarët", u shpreh Ahmetaj pak ditë më parë. Strukturat në varësi të Ministrisë së Financave dhe Ekonomisë, Drejtoria e Përgjithshme e Tatimeve, Drejtoria e Përgjithshme e Doganave dhe Inspektorati i Punës do të organizohen në grupe të përbashkëta, të orientuara nga analiza e profileve të riskut të sektorëve dhe bizneseve brenda tyre, duke pasur në fokus të gjithë zinxhirin e transaksioneve nga biznesi i madh deri te konsumatori final. Punësimi e siguria në punë do të kenë një vëmendje të posaçme brenda aksionit. Po kështu pak ditë më parë në një letër drejtuar sipërmarrësve, Ahmetaj thoshte se së shpejti do të prezantojë edhe planin e masave për vazhdimin e betejës kundër informalitetit në ekonomi, duke shtuar se qeveria do të këmbëngulë në zbatuesh- mërinë e ligjit, për garantimin e rregullave të drejta e të barabarta në një treg të hapur e konkurrues. Në këtë letër, Ahmetaj deklaroi, gjithashtu, se qeveria do të ndërmarrë një reformë në favor të sipërmarrjes për rregullimin e tregut përmes reduktimit të numrit të lejeve/ licencave dhe autorizimeve, si dhe dokumenteve që kërkohen nga zyrat e shtetit për përfitimin e një shërbimi apo një të drejte. "Angazhimi ynë në këtë drejtim, vijon edhe me një tjetër reformë thelbësore në favor të sipërmarrjes dhe rregullimin e tregut përmes reduktimit të numrit të lejeve/ licencave dhe autorizimeve, si dhe dokumenteve që kërkohen nga zyrat e shtetit për përfitimin e një shërbimi apo të drejte", thuhej në letër.