Thaçi kërkon nënshtetësi, Meta për BE: Demarkacioni, jo kusht për vizat

Presidenti nderohet në Kosovë me dekoratën "Urdhri i Pavarësisë" Kreu i shtetit: Zgjidhje është tejkalimi i problemit

Gazeta Shqiptare - - VIZITA - Darina Tanushi

Presidenti Meta nisi dje një vizitë zyrtare në Kosovë, ku u prit së pari nga Presidenti Hashim Thaçi. Pas nderimeve ushtarake të rastit dhe interpretimit të himneve të të dy shteteve në sheshin "Ibrahim Rugova", të dy presidentët zhvilluan një takim kokë më kokë mes tyre dhe më pas një takim të zgjeruar mes dy delegacioneve. Të dy presidentët firmosën një deklaratë të përbashkët, në të cilën thuhet: "Rikonfirmojnë vullnetin e ndërsjellë për rritjen dhe thellimin e bashkëpunimit vëllazëror e strategjik dhe me partnerët ndërkombëtarë". Të dy presidentët ranë dakord të refuzojnë "me vendosmëri çdo alternativë tjetër, që bie ndesh me projektet strategjike të integrimeve evropiane dhe euroatlantike dhe nxisin veprim të koordinuar, duke u përqendruar në: përshpejtimin simetrik të proceseve të integrimit të të gjitha vendeve të rajonit që dëshirojnë të anëtarësohen në BE dhe NATO; integrimi në BE dhe NATO mbeten procese thellësisht politike, me ndikim të jashtëzakonshëm në përfundimin e proceseve të paqes në rajon". Të dyja vendet do të hartojnë një dokument strategjik për anëtarësimin e plotë të Kosovës në BE dhe NATO. Gjithashtu, kërkohet liberalizim sa më i shpejtë i vizave ndërmjet Bashkimit Evropian dhe Kosovës dhe vijim i dialogut Kosovë- Serbi.

DEKLARATAT

Gjatë takimit, Presidenti Meta rikonfirmoi mbështetjen e fortë e të gjithanshme të Shqipërisë për Kosovën, si për sa i përket pavarësisë, sovranitetit dhe integritetit të saj, ashtu edhe për anëtarësimin e plotë në të gjitha organizatat rajonale dhe ato ndërkombëtare. Duke u ndalur në proceset integruese, Presidenti Meta theksoi se të dyja shtetet janë të përkushtuara ndaj vlerave dhe standardeve evropiane dhe euroatlantike dhe këto procese mbeten projektet strate- gjike më madhore për të dyja shtetet. Më pas Presidenti i Kosovës, Hashim Thaçi i akordoi Presidentit Ilir Meta titullin e lartë të Kosovës "Urdhri i Pavarësisë". Ndërkohë, në konferencën e përbashkët për shtyp, Presidenti i Kosovës, Thaçi i kërkoi Presidentit Meta që si pasojë e bllokadës që BE po u bën kosovarëve për të lëvizur lirshëm, Shqipëria t'u japë nënshtetësinë. "Kam kërkuar nga presidenti Meta që kosovarëve, sidomos studentëve dhe biznesmenëve, t'u mundësohet që të kenë nënshtetësi të Shqipërisë, në mënyrë që të lëvizin lirshëm. Këtë e mundëson edhe Kushtetuta e Kosovës, edhe ajo e Shqipërisë", tha Thaçi. Nga ana e tij, Presidenti Meta u shpreh se "zgjidhja nuk është që të merret nënshtetësia shqiptare për të gjithë qytetarët e Kosovës, pavarësisht nga dëshira për të kaluar këtë problem, jo për shkak të një mungese dëshire nga ana ime apo nga institucionet e Shqipërisë, por zgjidhja është tejkalimi i këtij problemi". Presidenti Meta tha: "Sa i përket çështjes së liberalizimit të vizave, nuk mund të ketë për momentin njeri në pozitë më të vështirë se Presidenti i Republikës së Shqipërisë për të folur për këtë çështje, për arsye se ka kërkesa pa fund nga personalitete dhe nga qytetarë të Kosovës për të marrë edhe nënshtetësinë e Republikës së Shqipërisë, me qëllimin kryesor për t'i shpëtuar kësaj bllokade, ku padrejtësisht qytetarët e Kosovës ndodhen prej disa vitesh. Theksojmë domosdoshmërinë e dhënies fund këtij izolimi për të mos thënë këtij diskriminimi që po përjetojnë qytetarët e Kosovës dhe që ka sjellë një frustrim për shkak të faktit se janë të vetmit qytetarë në Ballkanin Perëndimor që nuk e gëzojnë këtë mundësi". "Unë besoj që vendimi është i padrejtë për të kushtëzuar liberalizimin e vizave me çështjen e Demarkacionit", tha Meta.

Presidenti i Kosovës, Hashim Thaçi dhe homologu Ilir Meta

Newspapers in Albanian

Newspapers from Albania

© PressReader. All rights reserved.