LSI mbështet propozimin e PD, Vasili: Rishikimi i ndarjes territoriale, jo tabu
Lëvizja
Socialiste për Integrim deklaroi dje përmes kreut të grupit parlamentar, Petrit Vasli se është e hapur për të ridiskutuar ndarjen territoriale. "Rishikimi nuk është tabu, nuk kemi pasur tabu të ndryshojmë Kushtetutën me 64 nene, nuk kemi pasur tabu të ndryshojmë rregulloren e Kuvendit sa herë na ka dashur qejfi, nuk kemi pasur tabu për ligjet dhe kodet zgjedhore, nuk kemi pse të kemi tabu për ndarjen territoriale. Aq më tepër kur kryeministri pati ndër momentet e pakta të sinqeritetit që ky pushtet i ri lokal ka funksionuar shumë dobët, shpërdorimet janë më të mëdha sesa kur ishte me komuna, modeli nuk tregoi soliditet, çfarë arsye ka të trembemi nga rishikimi", u shpreh Vasili për "Balkan Web". Vasili sqaroi se mes PD dhe LSI nuk ka negociatë zyrtare për krijimin e një fronti të përbashkët opozitar. "Jo, nuk ka një negociatë në kuptimin siç do e imagjinonit ju, zyrtare apo formale, por ka një përpjekje të qartë të mendimit se një koordinim më i mirë në raport me një qeverisje që ka shkarë rrezikshëm në një mosqeverisje të vendit, për t'iu shmangur problemeve të mëdha si krimi i organizuar, droga dhe ekonomia. Kjo qasje e re, kjo ndjeshmëri e madhe e imponuar nga një elektoral i gjerë që është refuzues, indiferent dhe përbuzës ndaj qeverisë kërkon një sinkronizim tjetër politik. Ky moment sinkronizimi ekziston. Sa u takon mekanizmave të burokracisë politike, nuk kemi hapa të tillë, por kjo ndjeshmëri e re është shumë e rëndësishme sesa këto hapa, që natyrshëm mund të kryhen pa asnjë vështirësi", tha ai.