Shpërthen me tritol makina e inspektores së DAR
Frida Kopliku: S'kam konflikte me askënd
SHKODËR - Një shpërthim i fuqishëm me tritol ka tronditur dje banorët e qytetit të Shkodrës. Ngjarja ndodhi rreth orës 00: 50, në lagjen "Vojo Kushi" të qytetit verior, në zonën e këmbimit valutor. Mësohet se persona ende të paidentifikuar kanë vënë një sasi të konsiderueshme lënde plasëse poshtë automjetit tip "Volkswagen" me ngjyrë të bardhë e me targë AA 700 IY, e cila është në pronësi 60- vjeçares Frida Kopliku, me detyrë inspektore pranë Drejtorisë Arsimore Rajonale të Shkodrës. Burime zyrtare nga Drejtoria e Policisë së këtij qarku bënë me dije se si pasojë e shpërthimit të eksplozivit, makina e inspektores së arsimit është dëmtuar në pjesën e poshtme dhe pjesën mbrapa dhe më pas është përfshirë nga flakët. Mbërritja në kohë e zjarrfikëses ka bërë që të parandalohet djegia e plotë e mjetit. Sipas bluve, fatmirësisht nga shpërthimi nuk ka pasur dëme në njerëz, por vetëm dëme materiale te mjeti tip "Volkswagen". Menjëherë në vendngjarje kanë mbërritur blutë si dhe njësia antieksploziv. Pas kryerjes së veprimeve hetimore paraprake, policia deklaroi se lënda plasëse ishte përgatitur në mënyrë artizanale dhe amatore, ndaj dhe dëmet kanë qenë të pakta. "Në rast se sasia e eksplozivit do të ishte vendosur në një mënyrë më profesionale, atëherë makina që ishte objektiv i keqbërësve ( e parkuar në anë të rrugës "Vaso Kadia") do të ishte hedhur në erë", - thanë hetuesit e çështjes. Fillimisht është dyshuar për një shkëndijë elektrike, por pasi është këqyrur vendi i ngjarjes, policia ka gjetur një gropë të shkaktuar nga shpërthimi në anë të autoveturës, pranë sediljes së pasagjerit. Pavarësisht hetimeve intensive ( janë sekuestruar pamjet filmike të kamerave të sigurisë pranë vendit të ngjarjes), policia ende nuk ka identifikuar autorët e krimit. Ndërsa, nuk dihet dhe motivi i shpërthimit me tritol të automjetit të inspektores së DAR Shkodër, Frida Kopliku. Ndërkohë, policia ka marrë në pyetje 60- vjeçaren, e cila ka deklaruar se nuk e ka idenë se kush janë autorët dhe se nuk ka ndonjë konflikt me askënd. "Nuk e kam idenë se kush e ka vendosur tritolin. Unë nuk kam probleme apo konflikte me askënd. Shpërthimin me tritol e mora vesh nga mediat dhe kam ardhur menjëherë në vendin e ngjarjes. Jam e habitur për çfarë ka ndodhur, sepse nuk ka asnjë arsye që të ndodhë një gjë e tillë. Ajo që kërkoj është kjo ngjarje të zbardhet sa më parë", - është shprehur Kopliku. se. ni.
KOPLIKU
"Nuk e kam idenë se kush e ka vendosur tritolin. Unë nuk kam probleme apo konflikte me askënd. Shpërthimin me tritol e mora vesh nga mediat dhe kam ardhur menjëherë në vendin e ngjarjes”.