"ME DY FYTYRA", NJË ROMAN PËR MISTERIN DHE IDENTITETIN
Letërsia
bashkëkohore e Uellsit i pati fillesat e veta nga fundi i shekullit të 19- të, kohë që përkon me themelimin e Universitetit të Uellsit. Ka nxjerrë nga gjiri i saj shkrimtarë mjaft të talentuar, të vlerësuar me çmime të rëndësishme, një ndër të cilat është edhe Stivie Davis, autorja e librit ' Me dy fytyra'. Ajo ka lindur në Uells, por pjesën më të madhe të jetës së saj si e rritur e ka kaluar në Mançester. Ndërsa fëmijërinë e ka kaluar nëpër vende të ndryshme, duke nisur nga Egjipti, Skocia e Gjermania, duke ndërruar të paktën gjashtëmbëdhjetë shkolla të ndryshme, pasi i ati ishte anëtar i REF ( Forcave Ajrore Mbretërore). Pavarësisht nga kjo, ndjesia e përkatësisë ka qenë përherë e lidhur me rrënjët e saj nga Uellsi. Kjo vihet re edhe nga periudhat e shkurtra të pushimeve që kalonte në Swansea, Uells të cilën e konsideronte si shtëpinë apo bazën e saj të sigurt, ku ndihej e lumtur kur kthehej nga jeta nomade. Pasi kreu studimet në Univer- sitetin e Mançesterit, ajo vazhdoi të mbante leksione atje, duke u kthyer përfundimisht në Swansea në vitin 2001. Aktualisht, ajo është profesore e Shkrimit Krijues në Universitetin e Swansea- it. Stevie është gjithashtu anëtare e Shoqërisë Mbretërore të Letërsisë ( Royal Society of Literature) si dhe anëtare e Akademisë së Uellsit. Ajo është romanciere, kritike letrare, biografe historiane, madje konsiderohet si një nga shkrimtaret më të mira bashkëkohore. Stivie ka shkruar dymbëdhjetë romane dhe një sërë artikujsh e tregimesh si dhe është vlerësuar me çmime të ndryshme, si Çmimi i Librit nga Shoqëria Fawcett për librin ' Djaloshi blu' ( 1987), çmimin Libri i Vitit për ' Elementi i ujit' ( 2001) nga Këshilli i Arteve të Uellsit etj. Po ashtu ajo ka qenë kandidate për një sërë çmimesh të tjera të rëndësishme, si Booker apo Orange. Në të vërtetë, ' Me dy fytyra' është novela e parë e autores Stevie Davies. Ajo ndërthur stilin poetik të romaneve me mprehtësinë satirike, tipike për tregimet e saj. ' Me dy fytyra' trajton temën e dashurisë, miqësisë, tradhtisë, pra natyrën e qenies njerëzore në tërësi, thelbin e identitetit tonë. Autorja shpesh priret të shkrijë vepra letrare të së shkuarës me krijimet e saj. Vetë titulli i novelës është një referencë për Makbethin dhe çdo kapitull hapet me një citim nga një mit i hershëm, por përkundër kësaj, fryma bashkëkohore përshkon gjithë veprën. ' Me dy fytyra' ngërthen në vetvete elementë të ndryshëm mitologjikë dhe nxjerr në pah mënyrat se si personazhet trillojnë apo paraqesin të vërteta që nuk janë gjë tjetër veçse gjysmë të vërteta. Sebastian Mesenxheri është personazhi kryesor rreth të cilit vërtitet gjithçka. Ai është një i ri rreth të tridhjetave, i specializuar në fushën e egjiptologjisë e me prirje homoseksuale, i cili po merr pjesë në një konferencë akademike në Gowr të Uellsit. Ai dhe partneri i tij Xhesi po kalojnë një periudhë të vështirë në marrëdhënien e tyre, kryesisht si rezultat i pamundësisë së Sebastianit për t'iu dedikuar seriozisht kësaj lidhjeje. Flitet gjithashtu edhe për Xhek Mesenxherin, babain e Sebastianit, jeta dhe veprimtaria e të cilit është një enigmë më vete. Ai u zhduk në kufirin iranian në periudhën e revolucionit Islamik, kur Sebastiani ishte rreth trembëdhjetë vjeç, por mbetjet e tij u gjetën shumë vite më vonë. Pjesa më e madhe e ngjarjeve janë vendosur në Uells, në konferencë, por shpeshherë Sebastiani hedh vështrimin pas, në të shkuarën e tij, dhe u kthehet kujtimeve me të atin, të cilat ndonjëherë i shkaktojnë dhembje. Në konferencë takohet me një akademik të famshëm, Ris Salvatoren, i cili i duket shumë i njohur dhe që e bën atë të mendojë për të atin. Kështu, pra, fillon kërkimi për Xhek Mesenxherin ose bashkimi i pjesëve të enigmës që përfaqësonte ai. Ka mistere brenda mistereve të cilat Stivie Davies arrin t'i përçojë te lexuesi me shumë mjeshtëri. Kush është në të vërtetë Ris Salvatore? Çfarë lidhje ka ai me Xhek Mesenxherin dhe familjen e tij? Si kanë ndikuar kujtimet nga e kaluara në marrëdhënien e trazuar me Xhesin? Anisa Trifoni