Vetingu, KLD mbyll vlerësimin për gjyqtarët e shkallës së parë dhe të dytë

Grupi i punës paraqiti dje raportin para presidentit

Këshilli

i Lartë i Drejtësisë ka përfunduar vlerësimin profesional për gjyqtarët e shkallës së parë dhe të dytë. Në mbledhjen e djeshme, të drejtuar nga presidenti Ilir Meta, anëtarët e KLD- së u njohën me informacionin e përditësuar të përgatitur nga Grupi i Punës ngritur me vendimin e KLD- së, në mbështetje të procesit të rivlerësimit kalimtar të gjyqtarëve. Nga Këshilli u miratua forma standarde e Raportit "Për analizimin e vlerësimit profesional të subjektit të rivlerësimit", që hartohet nga Inspektorati i KLDsë. Po ashtu u miratuan rregullat për përzgjedhjen me short të 5 dosjeve për analizimin e aftësive profesionale nga Inspektorati i KLD- së në procesin e rivlerësimit kalimtar të subjekteve të rivlerësimit, si dhe kalendari për organizimin e shorteve dhe veprimeve për përfundimin nga Inspektorati të raporteve për analizimin e aftësive profesionale të 35 subjekteve me përparësi në procesin e rivlerësimit kalimtar. Me përfundimin e akteve të Vlerësimit në mbledhjen plenare të datës 16.10.2017, Këshilli konstatoi përfundimin e vlerësimit profesional për gjyqtarët e shkallës së parë dhe të dytë për vitet 2007- 2009, si dhe urdhëroi hartimin e raportit sipas nenit 171, pika 1 dhe 98 të ligjit nr. 96/ 2016, "Për statusin e gjyqtarëve dhe të prokurorëve në RSH". Gjithashtu, Këshilli vendosi delegimin e disa gjyqtarëve në shqyrtimin e çështjeve të caktuara gjyqësore, në gjykata të tjera nga ku ata janë emëruar për të ushtruar funksionin e gjyqtarit.