Durim Keçi rrezikon të mos ekstradohet në Itali
Një javë më parë u arrestua në Durrës, avokati Ilia Ilia: Mungon garancia në dosje "I forti" i Shijakut, i përfolur si mik i politikanëve
Durim Keçi, i njohur si "i forti" i Shijakut dhe i përfolur si miku i politikanëve të të gjitha ngjyrave, rrezikon të mos ekstradohet drejt Italisë nëse autoritetet e këtij vendi nuk japin garanci se do ta gjykojnë nga e para. Ndryshimet e fundit ligjore në Kodin e Procedurës Penale, që kanë hyrë në fuqi më datë 1 gusht të këtij viti, detyrojnë Ministrinë e Drejtësisë t'i drejtohet shtetit kërkues dhe të marrë garanci për rigjykim të çdo shtetasi shqiptar të dënuar në mungesë. Durim Keçi, në vitin 2014 është dënuar nga gjykata e Xhenovës, me 9 vite e 7 muaj burgim, për akuzat e pjesëmarrjes në organizatë kriminale, shfrytëzim prostitucioni, trafik droge apo shkatërrim prone. Nga të dhënat rezulton se shijakasi është arrestuar vite më parë në Itali në kuadër të operacioni "Kanun", të ndërmarrë nga karabinierët në zonën e Bergamos, bazuar në denoncimin e dy vajzave nga Katundi i Ri në Durrës. Për arsye procedurale ai është liruar nga paraburgimi dhe pas kësaj është rikthyer në Shqipëri. Ndërkohë, në shte- tin fqinj ka vijuar gjykimi në mungesë i Keçit, në përfundim të të cilit është cilësuar fajtor. Avokati Ilia Ilia konfirmoi për "News24" se mungon garancia në dosje, çka përbën shkak thelbësor për refuzimin e ekstradim- it. Ministrja e Drejtësisë, Etilda Gjonaj, e kontaktuar nga "News24" nuk dha asnjë shpjegim për çështjen në fjalë. Durim Keçi u arrestua një javë më parë në Durrës, pasi ishte në kërkim nga Interpoli që prej vitit 2016. I pashpjeguar mbetet fakti që urdhër- arresti ndërkombëtar ndaj tij nuk ishte ekzekutuar edhe pse autoritetet shqiptare kishin dijeni për ekzistencën e tij prej afro një viti. Shijakasi u shndërrua në emrin më të diskutuar ditët e fundit dhe u bë objekt debatesh të forta në parlament. Kreu i opozitës, Lulzim Basha, teksa hidhte akuza të forta në drejtim të mazhorancës për lidhje me kriminelë, publikoi foto të Keçit me deputetë socialistë. I menjëhershëm ishte reagimi i kryeministrit Rama dhe Taulant Ballës, të cilët treguan në parlament, foto të Durim Keçit te çadra e protestës së demokratëve.