Norman Duncan: Sekuestroni pasuritë e krimit, ju mbështesim
Ambasadori britanik: Mbi 600 shqiptarë janë në burg për drogë
Ambasadori
britanik në Shqipëri nuk ka pranuar të komentojë përgjimet e fundit në dosjen e drejtësisë italiane dhe ku pretendohet lidhja e politikës me krimin, por ka thënë se në vendin e tij mbetet ende i madh numri i shqiptarëve që merren me aktivitete kriminal. I pyetur nga mediat, Duncan tha se sfidë mbetet sekuestrimi i aseteve të siguruara nga aktiviteti kriminal. Ambasadori i Britanisë, i njohur për deklarata e tij të forta për situatat politike në Shqipëri, nuk ka pranuar të komentojë skandalin më të fundit ku pretendohet lidhja e politikës me trafikun e drogës. I pyetur për këtë Norman Duncan nuk ka folur për këtë skandal, por nuk ka nguruar të flasë. Shqetësim i madh në Britani mbetet përfshirja e shqiptarëve në trafikun e drogës dhe krimin e organizuar. "Më shumë se 600 shqiptarë janë në burg në Britaninë e Madhe, dhe shumica për trafikim droge. Situata është shqetësuese. Rreth 60% e shqiptarëve që vijnë në vëmendje të autoriteteve britanike, vijnë nga rrethe të Shqipërisë, Kukësi, Dibra dhe Shkodra, zona që përbëjnë 15% të popullsisë së vendit",- tha Duncan. Ambasadori risolli në vëmendje faktin se një pjesë e mirë e të ardhurave të përfituara nga trafiqet e paligjshme janë investuar në Shqipëri. Ndaj diplomati britanik thekson bashkëpunimin mes dy vendeve për sekuestrimin e aseteve të krimit mbetet i rëndësishëm. "Kemi pasur bashkëpunim me autoritetet shqiptare për sfidat e përbashkëta. Ne po punojmë me Ministrinë e Brendshme dhe pjesë të tjera të qeverisë në projekte bashkëpunimi e mbështetjeje, në mars kur ministri i Sigurisë, Ben Wallace u takua me ministrin e Financave dhe diskutoi për sekuestrimin e aseteve të krimit dhe ndihmën që mund të japë Britania e Madhe",- u shpreh ambasadori britanik.