Vaksinimi, kategoritë më të riskuara nga gripi
Organizata Botërore e Shëndetësisë: 100 mijë doza në dispozicion Fushata, ja kush përfiton falas
Me ardhjen e sezonit të sëmundjeve gri pale, ka nisur ditën e djeshme fushata e vaksinimit ndaj gripit në spitalin e mushkërive, "Shefqet Ndroqi". Rreth 100 mijë doza vaksinash antigrip janë vënë në dispozicion të popullatës, të cilat janë parakualifikuar nga Organizata Botërore e Shëndetësisë. Shefja e Departamentit të Kontrollit të Sëmundjeve Infektive në ISHP, dr. Silva Bino bëri thirrje për vaksinim të popullatës në risk, veçanërisht fëmijët, gratë shtatzëna dhe të moshuarit me sëmundje kronike. Sipas saj, vaksina ndaj gripit është e nevojshme, pasi ul ndjeshëm komplikacionet. Fushata e vaksinimit u çel pikërisht në atë spital, i cili një vit më parë ka përballuar një numër shumë të lartë të pacientëve me komplikacione të rënda të kësaj sëmundjeje virale. Kjo është një nismë e Ministrisë së Shëndetësisë, nëpërmjet Institutit të Shëndetit Publik, në bashkëpunim me OBSH. Vaksinim falas do të ofrohet për personelin shëndetësor në mbarë vendin, gratë shtatzëna si dhe për kategorinë më të riskuar për komplikacione nga gripi, që do të sigurohen nga MSHMS. "Për herë të parë, fushata fillon në tetor në kohën e duhur për të qenë efikase për gripin stinor, në mënyrë që të minimizohen komplikacionet", - tha zv/ ministrja e Shëndetësisë, Mira Rakacolli gjatë aktivitetit. Ndërsa, përfaqësuesja e zyrës së OBSH në Shqipëri, Nazira Artykova shprehu mbështetjen e OBSH për procesin e vaksinimit për kategoritë më të rrezikuara në Shqipëri. Muaji tetor shënon fillimin e sezonit të gripit dhe Instituti i Shëndetit Publik po punon me qëllim sensibilizimin e opinionit publik që të vaksinohen për të parandaluar sëmundjen. Gripi është një sëmundje infektive virale, e cila paraqitet në forma të lehta, por në raste të veçanta mund të shkaktojë forma të rënda dhe komplikacione që mund të çojnë deri në vdekje. Në Shqipëri që prej 2014ës ofrohet një program vaksinimi për punonjësit e shëndetësisë, pasi këta të fundit janë ndër personat që preken më shpesh nga kjo sëmundje infektive virale.