Trafiku i drogës, gjykata lë në burg dy miqtë e Habilajve
Prokuroria zbardh dosjen e grupit kriminal, të përfshirë edhe zyrtarë policie Seiti, në kërkim ndërkombëtar nga Italia
Gjykata e Katanias ka kërkuar masën e arrestit për Seitin, pasi dyshohet si ndërmjetës dhe financues i vëllezërve Habilaj, duke transportuar drogë nga Shqipëria në Itali. Prokuroria për Krime të Rënda ka zbardhur dosjen e grupit kriminal "Habilaj", ndërsa bën me dije se në aktivitetin e paligjshëm dyshohet se janë përfshirë edhe disa zyrtarë policie.
Gjykata e Krimeve të Rënda ka lënë dje në burg anëtarët e grupit kriminal "Habilaj". Bëhet fjalë për Nezar Seitin dhe Armando Koçerrin, të cilët u arrestuan pak ditë më parë në fshatin Babicë të Vlorës. Relatorja Liljana Baku dha masën e sigurisë "arrest me burg" pa afat për të pandehurin Koçerri, i cili është pronari i banesës në fshatin Babicë, ku u gjetën dhe u sekuestruan rreth 4 tonë kanabis. Ndërkohë, i pandehuri Nezar Seiti është lënë në burg 20 ditë, duke i dhënë kohë prokurorisë të paraqesë në një seancë të ardhshme përkthimet e plota zyrtare të materialeve të mbërritura nga Italia në ngarkim të tij. Nga ana tjetër, Gjykata e Katanias ka kërkuar masën e arrestit për Seitin, pasi dyshohet si ndërmjetës dhe financues i vëllezërve Habilaj, duke transportuar drogë nga Shqipëria në Itali. Prokuroria për Krime të Rënda ka zbardhur dosjen e grupit kriminal "Habilaj", ndërsa bën me dije se në aktivitetin e paligjshëm dyshohet se janë përfshirë edhe disa zyrtarë policie.
DOSJA E PROKURORISË
Prokuroria për Krime të Rënda kërkoi caktimin e masës së sigurisë "arrest me burg" për shtetasit Armand Koçerri dhe Nezar Seiti, të dyshuar për kryerjen e veprave penale të "Trafikimit të lëndëve narkotike", të kryer në bashkëpunim, në formën e grupit të strukturuar kriminal. Këta dy persona janë arrestuar në kuadër të hetimeve që po zhvillon Prokuroria për Krime të Rënda ndaj një grupi të strukturuar kriminal, të njohur si "Habilaj". I dyshuari Koçerri u arrestua në flagrancë, pasi në vijim të hetimeve të Prokurorisë për Krime të Rënda, në shtëpinë e tij në Babicë të Vlorës u gjetën rreth 4 tonë lëndë narkotike kanabis sativa, në gjendje të tharë dhe gati për trafikim. Ndërsa, i dyshuari Seiti u ndalua me urdhër të Prokurorisë për Krime të Rënda. Ai ka qenë nën hetim, në kuadër të një procedimi penal që po kryej pranë kësaj prokurorie. Por, deri në momentin e ndalimit nuk ishin siguruar prova të plota në ngarkim të tij nga hetimet e kryera në territorin shqiptar. Ndërkohë, provat e mjaftueshme për të siguruar ndalimin Seitit u siguruan në bashkëpunim me autoritetet italiane, të cilat organizuan disa ditë më parë në Itali një operacion kundër disa anëtarëve të tjerë të këtij grupi kriminal. Në vijim të komunikimit me autoritetet italiane, Prokuroria për Krime të Rënda siguroi të dhënat e mjaftueshme në ngarkim të tij dhe urdhëroi ndalimin, i cili u realizua nga ana e Policisë Gjyqësore.
Në bazë të akteve hetimore të deritanishme, rezulton se Prokuroria për Krime të Rënda ka regjistruar procedim penal ndaj grupit të njohur si "Habilaj" në vitin 2016, në bazë të informacioneve të siguruara nga shërbimet inteligjente. Në këtë informacion flitej edhe për përfshirje të zyrtarëve të policisë. Pas verifikimeve të nevojshme të këtij materiali, prokuroria ka zhvilluar hetimet, duke mbajtur në konsideratë edhe faktin se përfshirja e dyshuar e zyrtarëve të policisë në bashkëpunim me trafikantët mund të cenonte procesin hetimor. Në prill të 2017- ës, pra rreth një vit pasi Prokuroria për Krime të Rënda kishte regjistruar procedim penal ndaj këtij grupi, nga ana e Policisë së Vlorës është përcjellë një material referues, i cili kishte nevojë për shumë veprime të tjera hetimore shtesë për të siguruar provat e nevojshme ligjore. Deri në tetor të 2017- ës nuk u arritën të siguroheshin prova të plota ligjore mbi aktivitetin kriminal të anëtarëve të këtij grupi. Ndërkohë, autoritetet italiane, në vijim të një hetimi të nisur prej tyre në vitin 2013, goditën anëtarë të këtij grupi në Itali. Në bazë të të dhënave të bëra publike për këtë operacion në Itali, Prokuroria për Krime regjistroi një tjetër procedim penal. Pasi u konstatua se bëhej fjalë për të njëjtët persona, për të cilët Prokuroria për Krime të Rënda kishte regjistruar procedim penal në vitin 2016, atëherë u vendos bashkimi i procedimeve penale. Nga ana e autoriteteve italiane të drejtësisë është arrestuar personi në hetim, Moisi Habilaj dhe disa persona të tjerë, si të dyshuar për kryerjen e veprave penale të trafikimit të narkotikëve, kryer në bashkëpunim, në formë të posaçme të grupit të strukturuar kriminal. Arrestimi i këtij shtetasi është bërë në funksion të hetimeve, që autoritetet italiane po zhvillojnë në lidhje me faktin e sekuestrimit të sasisë prej 3.5 tonë lëndë narkotike të llojit kanabis sativa. Nga hetimet rezulton se shtetasi Moisi Habilaj në bashkëpunim me shtetasin Nezar Seiti dhe disa persona të tjerë kanë arritur të bëjnë të mundur kultivimin e sasive të konsiderueshme të lëndës narkotike dhe trafikimin e saj në mënyrë të organizuar nga Shqipëria në Itali, duke vepruar në formën e grupit të strukturuar kriminal.
Më datë 18.10.2017, gjatë kontrollit të banesës së shtetasit Armand Koçerri në fshatin Babicë e Vogël, tek një dhomë të katit të parë është gjetur dhe sekuestruar sasia e lëndës narkotike e llojit kanabis sativa, prej 3978 kg, e paketuar në disa pako të mbështjella me qese natribani. Në kuadër të këtij operacioni në Vlorë është gjetur dhe sekuestruar mjeti lundrues gomone, që dyshohet se është përdorur nga grupi kriminal për trafikimin e lëndës narkotike. Në këto rrethana, nga policia gjyqësore, më datë 18.10.2017 është bërë arrestimi në flagrancë i shtetasit Armand Koçerri, për kryerjen e veprave penale "Prodhimi dhe shitja e narkotikëve", në bashkëpunim, në formën e posaçme të grupit të strukturuar kriminal. Po ashtu, me urdhër të prokurorit është kryer ndalimi i shtetasit Nezar Seiti, pasi dyshohet si anëtar i grupit kriminal.