Seks me minorene dhe drogë në qendrën e emigrantëve, kapen pesë shqiptarë
ITALI- Bënin festa droge e seks me minorene dhe vendi i zgjedhur për këto festa të çmendura ishte një rezidencë. Por, jo një dosido, Felicioni, një strukturë në Roseto të Abruzzos ( Teramo), përballë detit, me pishinë, e cila pret prej vitesh 124 emigrantë. Të gjithë azilkërkues. Në pranga kanë përfunduar pesë shqiptarë në përfundim të një hetimi të gjatë të nisur që në muajin prill me arrestimin e njërit prej tyre, të cilit iu gjetën 40 gramë kokainë. Mediat italiane kanë zbuluar të tjera detaje për bandën me shqiptarë të kapur 5 ditë më parë. Karabinierët kanë kuptuar se mund të bëhej fjalë për një rreth të gjerë trafiku, të cilin e kanë zbuluar me hetime në terren, përgjime telefonike, ambientale dhe filmimet. Një bandë e vërtetë, në të cilën bënin pjesë Alban Guga, 23 vjeç dhe Bruno Xhaysa, 28 vjeç, të dy rezidentë në Roseto. Gëzim Papa, 29 vjeç; Viktor Gjeci, 23 vjeç dhe Bledar Laçi, 29 vjeç, rezidentë në Rutigliano ( Bari), të gjithë të gjykuar disa herë. Të pesë shqiptarët kishin organizuar një xhiro të shpërndarjes së kokainës dhe marijuanës mes Rosetos dhe rrethinave dhe shpesh takimet me blerësit ( dhjetëra e dhjetëra të rinj edhe minorenë, të gjithë të fotografuar dhe të filmuar nga karabinierët) bëheshin pikërisht brenda rezidencës "Felicioni", ku personat nën hetim prenotonin dhoma dhe organizonin festa të vërteta me baze droge e seksi. Në disa raste vajzat që merrnin pjesë në takime, duke mos pasur para e paguanin kokainën dhe marijuanën me favore seksuale. Akuzat për 5 shqiptarët janë për shpërndarje droge të rrethana të rënduara për shkak të moshës minorene të klientëve ( për dy shqiptarët rezidentë në Roseto) dhe shpërndarje e zhvatje e rëndë ( për shqiptarët rezidentë në Pulia). Viktimat e zhvatjes ishin dy shqiptarët rezidentë në Roseto, të cilët nga tre shqiptarët e Pulias kishin marrë 200 gramë kokainë ( me vlerë rreth 10 mijë euro), por pa ua paguar.