Imuniteti i Tahirit, sot vendos Kuvendi, raportet e PS dhe PD- LSI
Autorizimi ose jo i arrestimit, mazhoranca dhe opozita dorëzojnë rekomandimet Shumica: S'ka fakte. Pakica: Mori para nga kriminelët
Kuvendi mblidhet sot në seancë plenare, ku në rend të ditës do të jetë shqyrtimi i kërkesës së Prokurorisë pranë Gjykatës së Shkallës së Parë për Krimet e Rënda në Tiranë, "Për dhënien e autorizimit për arrestimin dhe heqjen e lirisë së deputetit të Kuvendit të Republikës së Shqipërisë, Saimir Tahiri". Sipas njoftimit zyrtar të Kuvendit, sqarohet se në këtë pikë do të dëgjohen dy raporte nga Këshilli për Rregulloren, Mandatet dhe Imunitetin, rekomandimi i shumicës parlamentare dhe rekomandimi i pakicës parlamentare. Më pas do të votohet nga deputetët. Në seancën e sotme në rend të ditës janë edhe "Miratimi i procesverbalit të seancës plenare të datës 12 tetor. Njoftimi i projektligjeve të depozituara në Kuvend. Njoftimi dhe miratimi i programit të punimeve të Kuvendit për periudhën në vijim. Njoftimi dhe miratimi i kalendarit 3- javor të punimeve të Kuvendit për periudhën në vijim. Si dhe më pas, diskutime për çështje jashtë rendit të ditës deri në 60 minuta".
MAZHORANCA
Mazhoranca dhe opozita dorëzuan dje në Kuvend dy raportet me rekomandimet e tyre për dhënien e autorizimit ose jo, prokurorisë për arrestimin e deputetit Saimir Tahiri. Mazhoranca pranon se parlamenti nuk ka të drejtë të gjykojë në themel kërkesën e prokurorisë, por argumenton se kërkesa duhet rrëzuar, sepse sipas tyre, ajo është "e motivuar politikisht". Kurse, deputetët e opozitës shprehen se barriera ligjore për Tahirin kompromenton imazhin e Kuvendit. Në raportin 22- faqësh të publikuar nga Kuvendi i Shqipërisë, të pestë deputetët e Partisë Socialiste Vasilika Hysi, Ulsi Manja, Klotilda Bushka, Bledar Çuçi dhe Gramoz Ruçi kërkuan rrëzimin e kërkesës së prokurorisë për arrestimin e Tahirit, por lejimin e prokurorisë që të merrte masa të tjera kufizuese për Tahirin, përfshirë autorizimin për kontroll personal dhe të banesës. Ata e argumentuan vendimin e tyre me nevojën për mbrojtjen e të drejtave të njeriut, si dhe me argumentin se shihnin "motive politike" te kërkesa e prokurorisë, por pa dhënë prova apo fakte dhe as nuk shpjeguan se cilat qenë arsyet që i shtynin të mendonin se prokuroria ka një axhendë politike në këtë rast. Për mazhorancën, organi i akuzës nuk mundi të argumentojë përfshirjen e deputetit Tahiri në veprimtari kundërligjshmërie dhe nuk paraqiti asnjë indicie, fillimprove apo provë që të krijonte bindjen se ka dyshime të arsyeshme dhe të bazuara për të autorizuar vijimin e procedurave për masën ekstreme të arrestit ndaj deputetit Tahiri. "Mungesa e provave, nxitimi i organit të akuzës për të kërkuar dhënien e autorizimit për arrestimin ose heqjen e lirisë së deputetit Saimir Tahiri, dy ditë pasi ka regjistruar procedimin penal dhe emrin e tij në regjistrin e çështjeve penale, krijon bindjen se në këtë stad të hetimeve që ka kryer prokuroria, ka sfond politik". Këto dhe argumente të tjera të zbardhura në këtë raport e kanë çuar shumicën parlamentare në konkluzionin se pranojnë të japin autorizimin për kontrollin e banesës së Saimir Tahirit, moslejimin e tij të dalë jashtë shtetit dhe një sërë detyrimesh të tjera, por jo dhënien e masës arrest me burg ose në shtëpi për deputetin e Kuvendit, Saimir Tahiri. Në raportin e deputetëve të PS- së, drejtuar Kuvendit shkruhet se provat e prokurorisë nuk ishin aspak sekrete, madje kishte pasur mungesë provash e nxitim. "Kemi bindjen se hetimet e prokurorisë kanë sfond politik. E drejta e lirisë nuk cenohet me fjalë, llafe dhe dyshime, të vërtetën e presim nga këto institucione drejtësie që kemi", thuhet në raport.
OPOZITA
5 deputetët e opozitës në Këshillin për Imunitetin dorëzojnë të tjera rekomandime. Ata argumentojnë se duhet të votohet pro arrestimit të deputetit Saimir Tahiri, me qëllim që t'i hapet rrugë hetimit të plotë dhe gjithanshëm në kuadër të procedimit penal nr. 313 të vitit 2017 për veprat penale të trafikimit të lëndëve narkotike në bashkëpunim në formën e posaçme të grupit të strukturuar kriminal dhe të korrupsionit pasiv të zyrtarëve të lartë, të parashikuara nga nenet përkatëse të Kodit Penal. Argumenti kryesor i deputetëve të opozitës është që mosdhënia e lejes do të përbëjë një barrierë ligjore dhe kompromenton imazhin e Kuvendit të Shqipërisë. Duke huazuar një argument po nga raporti i "Venecias", deputetët e opozitës shkruajnë: "Maksima ' sado lart që ti të jesh, ligji është gjithnjë mbi ty' përmbyset duke u shndërruar në ' nëse je anëtar i parlamentit, ligji nuk mund të të prekë'". Raporti i opozitës u firmos nga deputetët Dhurata Çupi, Eduard Halimi, Gent Strazimiri, Enkelejd Alibeaj dhe Nasip Naço. "Tahiri nuk është një ish- ministër apo deputet i opozitës. Ai është një ish- ministër i qeverisë, deputet i Edi Ramës, mik i ngushtë i kryeministrit. Ai si ish- ministër jo vetëm që dyshohet se ka ndihmuar organizatën kriminale dhe ka marrë shërbime personale, por duke i vënë strukturën e shtetit në shërbim të organizatës kriminale, ai ka siguruar para për zgjedhjet". Sipas 5 deputetëve përfaqësues të opozitës, arsyeja pse duhet arresti është edhe mbrojtja e provave, të cilat janë në rrezik sipas tyre, pasi mbikëqyren nga dy miqtë e ngushtë të deputetit Tahiri, kryeministri Edi Rama dhe ministri i Brendshëm. Sipas raportit të deputetëve të opozitës, PD- së dhe LSI- së, duke marrë në mbrojtje Tahirin dëmtohen provat, pasi shkeljet e pretenduara nga prokuroria janë të rënda. "Ekziston një procedim penal i ligjshëm për Tahirin, mosdhënia e autorizimit komprometon Kuvendin dhe mosheqja e imunitetit është pengim i drejtësisë", shkruhet në raport. Gjithashtu, deputetët opozitarë janë shprehur në raportin e tyre se pretendimet e prokurorisë nuk janë të pabazuara, pasi kërkesa e bërë shoqërohet me një numër të lartë provash. "Kërkesa e Prokurorisë shoqërohet me një numër të lartë provash, akuzat e ngritura nuk janë të bazuara në politikë", thuhet në raportin e PD- së.