' Tetori gjerman', Meta: Kultura krijon lidhje të forta mes kombeve
Presidenti merr pjesë në ekspozitën e autores gjermane, Rosemarie Trockel "Bashkëpunimi mes dy vendeve është forcuar në 30 vite"
Presidenti i Republikës, Ilir Meta, mori pjesë dje në ceremoninë e hapjes së ekspozitës së arteve figurative të autores gjermane, Rosemarie Trockel, e cila u zhvillua në Galerinë Kombëtare të Arteve në Tiranë. Në fjalën e tij, gjatë këtij aktiviteti që mbahet në kuadër të ' Tetorit gjerman', javëve të kulturës gjermane në Shqipëri, Presidenti Meta tha se ' Tetori gjerman' është kthyer në një traditë të mrekullueshme për shqiptarët dhe se kultura krijon lidhjet më të forta dhe më afatgjata midis vendeve e kombeve. Gjithashtu, presidenti theksoi se miqësia dhe bashkëpunimi mes dy vendeve është forcuar e zgjeruar në përmasa të paimagjinueshme në 30 vitet e fundit dhe se në këto tri dekada, një rol të rëndësishëm për afrimin e njerëzve ka luajtur në mënyrë të veçantë kultura dhe arti. "Natyrisht që kjo është një ngjarje tepër e rëndësishme, pasi kultura krijon lidhjet më të forta dhe më afatgjata midis vendeve dhe midis kombeve", tha Meta. "30- vjet më parë, Shqipëria po mundohej të hidhte hapat e para të daljes nga izolimi i gjatë dhe shkatërrues për ekonominë. Ndërsa, Republika Federale e Gjermanisë po bëhej gati të merrte përgjegjësitë, jo vetëm të bashkimit të Gjermanisë, por edhe të gjithë kontinentit evropian", u shpreh presidenti. "Me një dinamikë shumë të larmishme e të admirueshme, miqësia dhe bashkëpunimi mes dy vendeve është forcuar dhe zgjeruar në përmasa të paimagjinueshme këtu e 30 vite më parë. Padyshim që në këto tri dekada, një rol të rëndësishëm për afrimin e njerëzve ka luajtur në mënyrë të veçantë kultura dhe arti. Kontaktet e drejtpërdrejta mes qytetarëve dhe artistëve të të dyja vendeve janë rritur vit pas viti dhe gjermanët nuk e njohin më Shqipërinë dhe shqiptarët vetëm nga rrëfenjat dhe aventurat "fiction" të Karl May- it, i cili në fund të shekullit të 19 shkruante për vendin e shqiptarëve, pa e vizituar kurrë atë", deklaroi kreu i shtetit. "Edhe sot - vijoi presidenti - pas 30 vjet shkëmbimesh dhe bashkëpunimi të shkëlqyer në të gjitha fushat, ende shumë gjer- manë kur dëgjojnë për Shqipërinë, vënë buzën në gaz dhe kujtojnë vitet e hershme kur mësonin për shqiptarët përmes novelës së May- it. Shkëmbimet kulturore janë rritur, kontaktet e drejtpërdrejta, e jo vetëm të albanologëve apo studiuesve të specializuar nga të dyja vendet janë intensifikuar. Sot, me qindra të rinj shqiptarë mësojnë me dashuri e përkushtim gjuhën dhe kulturën gjermane, por po ashtu shumë të rinj gjermanë interesohen më shumë për atë që ofron Shqipëria, si në aspektin gjeografik e turistik, ashtu edhe në atë historik e kulturor. Numri i të rinjve gjermanë që vizitojnë vendin tonë është rritur ndjeshëm dhe po kështu, edhe artistë të zhanreve të ndryshme po performojnë gjithnjë e më shumë në skenat dhe ekspozitat shqiptare", vijoi Meta. "Jam i sigurt se pas hyrjes në fuqi të marrëveshjes së re kulturore mes dy vendeve, edhe në bashkëpunim me Ministrinë e Kulturës së Shqipërisë, por edhe aktorëve të tjerë të fushës, bashkëpunimi kulturor mes dy vendeve do të pasurohet akoma më shumë", tha Meta.