Sekuestrohen 1 milion euro marijuanë në Itali, ja si u kapën duke ngrënë shegë 3 shqiptarët

ITALI - Policia italiane ka sekuestruar rreth 110 kg marijuanë dhe ka vënë në pranga 5 persona, mes tyre 3 shqiptarë gjatë operacionit të koduar "Cargo" të konkluduar pas muajsh hetime në Ferrara. Superngarkesa e drogës kishte mbërritur në një kapanon të braktisur në rrugën "Marconi", por ata që vëzhgonin gjithçka ishin njerëzit e skuadrës së lëvizshme të policisë. Ishte një kapanon në rrugën "Marconi" në Ferrara, baza e mbërritjes së ngarkesës mbi 100 kg marijuanë me një vlerë në treg prej më shumë se një milion euro.

Dërgesa vinte nga Spanja me destinacion tregun e Italisë së Veriut. Por, skuadra e lëvizshme e policisë, e koordinuar nga drejtuesi Andrea Crucianelli, që prej javësh po punonin për operacionin e koduar "Cargo", e dinin se do të mbërrinte një ngarkesë e madhe në qytet, e dinin se ku por nuk e dinin se kur, vetëm prisnin. Kështu për 20 ditë, policët shtrihen barkas duke monitoruar çdo ditë dhe çdo orë një kapanon të braktisur, edhe me ndihmën e një kamere survejimi. Derisa, natën mes së dielës dhe së hënës, mbërrin kamioni që prisnin. Një mjet i tonazhit të rëndë që transportonte arka me fruta, mandarina, portokalle dhe shegë, si dhe 8 pako të mbyllura me nxehtësi që përmbanin më shumë se 110 kg marijuanë. Në timon ishte një transportues spanjoll, Joaqiun Martinez, 37 vjeç. Pranë tij një shtetas maroken, Nour Eddine Benazzi, 43 vjeç. Duke e pritur në brendësi tre burra me kombësi shqiptare: Vital Meço, 43 vjeç, banues në Cento; Tonin Bibaj, 33 vjeç dhe Alfred Gjoka, 36 vjeç, ( në shtëpinë e tij u gjetën gjithashtu 70 gr hashash), rezidentë në zonën e Savonës ( Alassio dhe Andora). Të tre personat ishin filmuar nga kamerat e survejimit në vendin e ngjarjes dy ditë më herët në kapanon. Për të mbuluar ngarkesën ' reale' ishte vendosur një mur me arka frutash. Një ndërhyrje rrufe që nuk i lë të tre trafikantët - që ishin duke folur dhe duke ngrënë shegë - kohë për të reaguar, dorëzohen menjëherë. Me ta janë 8 thasë plot marijuanë: me 10 euro për gram, do të sillte më shumë se një milion euro.