Fati i shtatë fëmijëve me aftësi të kufizuara, të braktisur nga familjet
Qendra e Zhvillimit Rezidencial, Durrës trajton 38 persona të moshës 7- 26 vjeç Përgjegjësi: Birësimi, proces i vështirë
Shumica e qytetarëve të Durrësit e dinë ku ndodhen vogëlushët e na orientojnë sesi të arrijmë deri aty. Nga larg dallohet një godinë e madhe e rrethuar me mure të lartë, vende- vende të plasaritur, që ka në përgjegjësi fatin e 34 personave me aftësi të kufizuar, prej të cilëve dhe shumë fëmijë. Pasi shtymë derën e rëndë të hekurit me mbishkrimin "Qendra Zhvillimit Rezidencial Durrës", hymë brenda në kopsht, ku shikojmë vogëlushët që po afrohen shumë miqësisht. "Unë jam Romina, më pëlqen të pikturoj. Këtu në qendër kam bërë shumë pikura të bukura", - thotë vogëlushja duke buzëqeshur. Të braktisur nga prindërit e tyre, plot 7 fëmijë me aftësi të kufizuar të moshës 7- 13 vjeç, trajtohen në Qendrën Kombëtare të Zhvillimit Rezidencial në qytetin e Durrësit. Sipas vendimit të gjykatës, këta vogëlushë janë shpallur "të braktisur" nga familjet, pasi për më shumë se një vit, asnjë nuk është kujtuar më për ta. I pyetur nga "Gazeta Shqiptare", përgjegjësi i sektorit social në këtë institucion tregon se dosjet e fëmijëve janë dërguar në Komunitetin e Birësimit. "Nuk kemi pasur asnjë shenjë interesimi nga prindërit dhe kështu në bashkëpunim me shoqatën amerikane "Bethany" kemi nisur procesin e birësimit për ta. Por, është e vështirë që të finalizohet ky proces për shkak të problematikave shëndetësore që ata mbartin. Aktualisht po bëhen përpjekje për të birësuar 13- vjeçarin me paralizë cerebrale në Amerikë, por nuk e dimë nëse do mund të realizohet apo jo", - shprehet përgjegjësi. Edhe një vit më parë, përfaqësuesit e kësaj qendre rezidenciale janë munduar që të birësojnë një prej fëmijëve, por sipas prindërve të interesuar për procesin e adoptimit, ky vogëlush nuk i plotësonte kërkesat që ata kërkonin, pasi ishte i sëmurë.
SHERBIMET
Janë gjithsej 34 persona me aftësi të kufizuara të moshës 7- 26 vjeç që marrin përkujdesje në këtë qendër rezidenciale, kjo e fundit, në varësi të Shërbimit Social Shtetëror. "Përveç 7 fëmijëve të braktisur, 27 të tjerë janë lënë nga vetë familjet në këtë institucion, për shkak të kushteve ekonomike apo rrethanave të tjera. Normal- isht, ne po mundohemi t'u japim gjithë ngrohtësinë, kujdesin e dashurinë e nevojshme. Gjithmonë dëshirojmë që ata të ndihen sa më mirë në qendrën tonë, por roli i familjes në jetën e një fëmije është i pazëvendësueshëm", - tregon përgjegjësi. Ndërkaq, ai thotë se kategoritë që marrin shërbim janë individë me aftësi të veçanta të spektrit autizëm; ata me prapambetje mendore me parametra të lehtë, të mesëm, por edhe të rëndë; persona me sindromën Down si dhe ata me paralizë cerebrale. "Kjo është një qendër rezidenciale, pra këta individë me aftësi të kufizuara jetojnë në ambientet e qendrës. Këtu ne iu ofrojmë çdo lloj trajtimi duke filluar nga strehimi, ushqimi, përkujdesja, trajtimi me medikamente dhe specialistë në bazë të diagnozave si dhe aktivitete edukative për t'i integruar në jetën sociale", - thotë përgjegjësi. Qëllimi i këtij institucioni është përmirësimi dhe aftësimi i këtyre fëmijëve në jetën sociale, si dhe rikthimi i tyre në familjet biologjike. Kjo qendër ka bashkëpunim edhe me shkollën sociale të qytetit, ku çdo ditë një pjesë e fëmijëve ndjekin programin arsimor edukativ të këtij institucio- ni. Madje, përfaqësuesi i sektorit social në qendrën rezidenciale tregon se një prej fëmijëve me prapambetje mendore është nxënës në një shkollë gjithëpërfshirëse dhe ka arritur të integrohet më së miri në jetën sociale e arsimore, normalisht i trajtuar me një program specifik. Gjithashtu, ai thekson se në qendër punohet me trajtime të specializuara dhe fizioterapisti dhe ortofonisti janë të trajnuar posaçërisht në fushën e aftësisë së kufizuar. "Pavarësisht problemeve dhe shqetësimeve që mund të kemi hasur në rrugën tonë, kemi arritur t'ia dalim dhe jemi përpjekur që çdo gjë ta zgjidhim në mënyrën më të mirë të mundshme, ku shpesh edhe vullnetarët apo donatorët e ndryshëm na kanë ofruar ndihmë", - shprehet për ' GSH' përgjegjësi social.
AKTIVITETET
Qendra e Zhvillimit Rezidencial në Durrës realizon një sërë aktivitetesh për t'i argëtuar e për t'i integruar sa më mirë këta individë në jetën sociale. Çdo fëmije e të riu me aftësi të veçanta në këtë qendër i realizohet festa e ditëlindjes, ku marrin pjesë edhe animatorë të ndryshëm, çka i bën fëmijët që të këndojnë e të kërcejnë së bashku. "Çdo të enjte, vullnetarët e një kishe që ne kemi arritur një bashkëpunim, vijnë dhe marrin fëmijët në karrige me rrota për t'i nxjerrë shëtitje, normalisht të shoqëruar edhe me pjesëtarë të stafit tonë. Ky është një lloj sensibilizimi edhe për opinionin publik, që duhet të reflektojë dhe të tregojë më tepër dashuri e ngrohtësi për fëmijët me nevoja të veçanta. Normalisht që për të rritur integrimin e tyre në jetën shoqërore, shpesh me ta kemi vizituar edhe Muzeun Arkeologjik, Amfiteatrin e madje edhe Kopshtin Zoologjik në Tiranë", - tregon përfaqësuesi i qendrës rezidenciale. Prej 3 vitesh, për t'u ofruar një mundësi në zhvillimin e aspektit profesional, 4 prej të rinjve të kësaj qendre janë përfitues të kurseve në Qendrën e Formimit Profesional.