Aksion në Dibër, arrestohen 5 persona, parandalohet edhe vrasja për borxhin

DIBËR - Mbrëmjen e së mërkurës, policia e Dibrës ka parandaluar përshkallëzimin e një konflikti, duke arrestuar një person e sekuestruar armën e zjarrit me fishek në gojë, gati për qitje. Gjithashtu, gjatë 24 orëve të fundit janë zbardhur 6 vjedhje, si dhe është goditur një rast i prodhimit dhe shitjes së lëndëve narkotike. Në pranga kanë përfunduar 5 persona, si dhe është shpallur në kërkim një tjetër. Për këto ngjarje janë sekuestruar armë zjarri, automjete, motorçikleta, lëndë narkotike e bimë narkotike të kultivuara. Sipas bluve, pas marrjes së informacionit për një konflikt të ndodhur në orët e pasdites midis dy personave në fshatin Shumbat, njësia Sllovë, konflikt i cili po përshkallëzohej në orët e mbrëmjes, ku njëra palë kishte një kallashnikov me vete, është ndërhyrë menjëherë. Në pranga ka përfunduar shtetasi Jetmir Kade, banues në Shumbat. Mësohet se 35vjeçari ishte konfliktuar me shtetasin A. D., për një shumë prej 9 mijë lekësh që ky i fundit ia kishte borxh. Kade kishte marrë armën dhe dyshohet se ka qëlluar në ajër para banesës së tij dhe më pas kishte shkuar rreth 300 m larg banesës për t'u sqaruar me shtetasin A. D. Ndërhyrja në kohë e policisë ka bërë të mundur parandalimin e një krimi të mundshëm. Po si rezultat i punës profesionale, policia e Dibrës ka zbardhur dhe dokumentuar 6 raste të vjedhjes së pronës. Konkretisht, në vijim të operacionit të nisur tri ditë më parë ku u arrestua një prej autorëve, Edison Çuku, 23 vjeç, banues Dobrovë ( i dënuar më parë për vjedhje), blutë ndaluan dhe 22- vjeçarin Gentjan Ismaili, banues në njësinë administrative Melan ( i dënuar më parë për vjedhje). Për këta dy shtetas është dokumentuar me prova ligjore autorësia e 6 rasteve të vjedhjeve të ndodhura më parë. Gjithashtu, policia e Dibrës ka arrestuar F. Ç., 28 vjeç, banues në Tiranë, i shpallur në kërkim për vjedhje. Në pranga ka përfunduar edhe Imer Lamallari, 50 vjeç, banues në fshatin Vasie, njësia administrative Kala e DodësDibër. Ndërsa, është shpallur në kërkim djali i tij 26- vjeçar, pasi gjatë kontrollit të ushtruar para banesës janë gjetur të kultivuara disa bimë kanabis. Kurse, në stallën e bagëtive u gjet një fuçi plastike me bimë të thara kanabisi, me peshë 3 kg e 30 gr.