Balla mbledh 61 krerët e PS- së, zgjedhje në 16 degë, kryetarët që ikin
Sekretari i Përgjithshëm: Procesi shtyhet deri më 30 nëntor
61
kryetarë të PS- së në bashkitë e vendit raportuan dje para sekretarit të përgjithshëm të PS- së, Taulant Balla, në një takim në selinë rozë. Për më shumë se një orë, Balla ka dëgjuar ecurinë e procesit zgjedhor nëpër degë. Procesi zgjedhor pritet të përfundojë në 30 nëntor, edhe pse ishte parashikuar që ai të mbaronte më datë 15 nëntor. Janë 16 bashki që do u duhet të rizgjedhin kryetarët e tyre, pasi kryetarët aktualë do duhet të lënë detyrën për rezultate të dobëta në detyrë. Gjithashtu, janë edhe dhjetë kryetarë bashkie që ushtrojnë paralelisht detyrën e kryetarit të degës, por edhe funksione të tjera. Mes tyre janë kryetarët e PS në Shkodër ( Arvit Osja), Gjirokastër ( Flamur Golemi), Berat ( Valbona Zylyftari), Lushnje ( Lindita Buxheli), Lezhë ( Ardiana Jaku). Pasi ka dëgjuar 61 krerët e degëve të PS, sekretari i përgjithshëm, Taulant Balla, ka urdhëruar shtyrjen me 15 ditë të procesit zgjedhor. Kështu, procesi zgjedhor në degët e PS do të jetë deri më 30 nëntor. "Kishim mbledhje organizative, që lidhet me raportimin e procesit zgjedhor në të gjitha degët. Kemi shtyrë afatin e procesit zgjedhor me 15 ditë për të përmbushur sipas statutit, të gjitha kërkesat që lidhen me kryetarët e organizatave", tha Balla. Në përfundim të mbledhjes me krerët e 61 degëve, nënkryetarja e grupit të PS, Elisa Spiropali, tha se po bëhet analiza në bazë të rezultateve të 2013 për rizgjedhjeve, moskandidimin apo edhe njëherë konfirmimin e atyre që kanë pasur rezultate të mira. "Ne kemi nxjerrë një udhëzim, që ka qenë edhe publik, po bëhet analiza në bazë të rezultateve që kanë pasur në 2013 për rizgjedhje, moskandidim apo edhe njëherë konfirmim, atëherë kur kanë pasur rezultate të mira", tha Spiropali.