"Habilajt", MD dorëzon te Krimet e Rënda 1800 faqe përgjime të përkthyera
Policia shqiptare u vu në ndjekje të Habilajve 50 ditë pas shkarkimit të Tahirit Në dosje, provat e mbledhura nga prokurorët e Katanias
Prokuroria e Krimeve të Rënda tashmë zotëron 1800 faqe përgjime të Habilajve, të përkthyer në shqip. Dosja e ardhur nëpërmjet një letërporosie nga drejtësia italiane është përkthyer nga Ministria e Drejtësisë. Ndërkohë nga hetimet e kryera nga Prokuroria e Krimeve të Rënda për çështjen "Habilaj" rezulton se ndjekja e grupit të Habilajve nga policia shqiptare filloi vetëm pas largimit të Saimir Tahirit nga posti i ministrit të Brendshëm.
DOSJA ME 1800 FAQE PËRGJIME
Përkthyes të certifikuar të Ministrisë së Drejtësisë dorëzojnë pranë Prokurorisë për Krimet e Rënda dosjen me 1800 faqe përgjimesh ndaj anëtarëve të bandës së Habilajve, të përkthyer në shqip. Pritej ky material në gjuhën shqipe, që organi i akuzës të thërras për të pyetur ishministrin Saimir Tahiri. Shkak për përkthimin e menjëhershëm të përgjimeve mes Habilajve është bërë edhe ekstradimi i shtetasit Nazer
Seiti. Kjo, pasi ndaj Seitit ( një tjetër i kërkuar nga drejtësia italiane) është marrë vendimi i arrestit me afat 20- ditor, ndërkohë që për ekstradimin e tij është lënë gjithashtu 20 ditë kohë. Megjithatë, siç është shprehur avokati i Banka e Shqipërisë kërkon të realizojë objektin e prokurimit:
tij mbrojtës, Seiti preferon më tepër t'i dorëzohet Italisë se sa të gjykohet në Shqipëri. Ndërkohë, grupi i prokurorëve ka sekuestruar librin e takimeve nga viti 2013 deri në 2017. Bëhet fjalë për periudhën kur në krye të Minis- trisë së Brendshme ishte Saimir Tahiri, të cilit do t'i rishikohen edhe emrat e personave që ka pritur në zyrë. Ky veprim hetimor po kryhet për të verifikuar përgjimet e italianëve ndaj njërit prej të dyshuarve në grup, shtetasit Florian Habilaj. Në funksion të këtyre hetimeve u janë kërkuar gjithashtu kompanive celulare që të dorëzojnë komunikimet telefonike të ishministrit të Brendshëm dhe të tre vëllezërve Habilaj si edhe qelizat e telefonave të tyre.
DOSJA "HABILAJ"
Mësohet se vetëm një muaj pasi Saimir Tahiri u shkarkua si ministër i Brendshëm dhe drejtimin e këtij dikasteri e mori Fatmir Xhafaj, policia u vu në ndjekje të Habilajve. Ishin blutë e Vlorës, që në prill 2017, i çuan materialin e parë Prokurorisë për Krime të Rënda për vëllezërit Moisi e Florian Habilaj dhe disa persona të tjerë, të dyshuar si pjesëtarë të një grupi kriminal në fushën e trafikut të drogës. Në dosjen hetimore thuhet se në datë 29 prill 2017 prokuroria regjistroi procedimin penal me nr. 164 për veprën penale të trafikimit të narkotikëve në bashkëpunim, mbi bazën e informacioneve referuese të shërbimeve të policisë gjyqësore të seksionit kundër narkotikëve në Drejtorinë Vendore të Policisë, Vlorë. Sipas këtyre informacioneve rezulton se Nezar Seitaj, Moisi Habilaj, Florian Habilaj dhe shtetasi M. M. ushtronin aktivitet kriminal në fushën e trafikimit të narkotikëve. Por, nga ana tjetër, Prokuroria për Krime të Rënda po hetonte prej muajit maj të 2016 një grup kriminal të drejtuar nga Taulant Haxhiraj, që dyshohej për bashkëpunim me Habilajt. Në dosje thuhet se anëtarët e grupit kriminal në fjalë, pasi kishin siguruar sipërfaqe toke në pyll apo kullota, në pronësi të shtetit ose të personave privatë, kultivonin në to bimë narkotike në sasi nga 4500 deri në 5000 rrënjë për secilën parcelë. Sipas prokurorisë, grupi kriminal kishte vendosur lidhje me punonjës të policisë vendore, të cilët kundrejt përfitimeve monetare u siguronin mbarëvajtjen e aktivitetit të paligjshëm. Gjashtë muaj pas sinjalizimit nga policia, Krimet e Rënda firmosën arrestimin e Armand Koçerrit, një prej njerëzve më të afërt të Habilajve, pasi në shtëpinë e tij në Babicë të Vogël u sekuestrua një sasi prej afro 4 tonë kanabis. Pas infermierit të Babicës, në pranga ra edhe një tjetër bashkëpunëtor, Nezar Seitaj, i cili po kërkohej nga prokuroria e Katanias. Por, vetëm pas arrestimit të Moisi Habilajt në Itali, Prokuroria e Krimeve të Rënda çeli hetim ndaj ishministrit të Brendshëm, Saimir Tahirit, me dyshimet për përfshirje në grupin e kushërinjve të tij.