Basha: Rama i zhytur në krim, shteti në shërbim të kriminelëve
Kreu i PD: Shteti i krimit është shpalosur në mijëra faqe të drejtësisë italiane "Shqipëria për investitorët e huaj, zgjedhja e fundit"
Kreu i PD- së, Lulzim Basha, akuzoi dje Edi Ramën si të vetmin kryeministër që alternativë për qytetaret ka dhunën, presionin dhe burgun. Në bindjen e tij, z. Rama ka gati gijotinën për të varfrit dhe mbron Tahirin. Për kreun e demokratëve, shteti i krimit është shpalosur në mijëra faqe në drejtësinë italiane. Sipas Bashës, kryeministri po mbron trafikantët dhe po rrënon jetesën e shqiptarëve në mbarë vendin. "Se cili është shteti i Edi Ramës, u pa qartë çdo ditë këto 4 vite dhe e provuan në kurriz të shumicës së shqiptarëve. Sot shteti i tij i krimit është shpalosur dhe në mijëra faqe të drejtësisë italiane. Një shtet që funksionon i gjithi në shërbim të trafikantëve. Një shtet ku ministri i Brendshëm është shefi i madh i bandës. Një shtet, ku Rama vetë i bëhet pengesë drejtësisë duke e mbrojtur Tahirin, teksa bën gati gijotinën për të varfrit që s'kanë mundësi të paguajnë ujin. Edi Rama është i vetmi kryeministër që alternativë për qytetarët ka dhunën, presionin dhe burgun, ndërsa mbrojtjen, kujdesin dhe lehtësitë i ka për trafikantët me të cilët fiton dhe ndan pushtetin", theksoi z. Basha. Ai evidentoi se: "Një kryeministër i përgjegjshëm s'do gjente qetësi derisa të krijonte mundësi për qytetarët e tij që s'paguajnë dot faturën e ujit. Ndërsa Rama i kërcënon me burg, ata që nuk sigurojnë dot as bukën e gojës. Sigurisht që për ata që janë abuzuesit më të mëdhenj nuk do ketë asnjë problem, siç ndodhi me aksionin famëkeq të energjisë, ku u shtynë drejt veëtvrasjes 12 kryefamiljarë, ndërsa oligarkët e lidhur me qeverinë vazhduan abuzime marramendëse me faturën e energjisë". Basha tha me tej se: "Një kryeministër i përgjegjshëm do orientonte investimet që hapin vende pune, do ulte taksat për biznesin, do rriste pagesën për familjet në ndihmë ekonomike dhe përmes buxhetit të shtetit, do merrte përsipër faturën e energjisë dhe ujit për familjet në pamundësi ekonomike. Dhe ky do ishte shteti për qytetarët, për hallet e përditshme të njerëzve".
Por sipas tij, "shteti i Edi Ramës është i gjithi në shërbim të tij dhe të kriminelëve të tij. Ai i shkel me këmbë qytetarët, atij nuk i duhen qytetarët. Shteti i Ramës është i zhytur në krim dhe i kapur nga krimi". Po dje kreu i PD- së reagoi pas raportit të BB "Doing Business 2018", që e rendit Shqipërinë 7 vende më poshtë se vitin e kaluar. Në një postim në ' FB', Basha tha se investitorët e huaj që duan të investojnë në Ballkan e shohin Shqipërinë si zgjedhjen e fundit. Sipas
Bashës, faktori kryesor i këtij përkeqësimi është rritja e taksave dhe detyrimeve. "Shqipëria humbet 7 vende në vlerësimin e raportit të Bankës Botërore ' Doing Business 2018'. Faktori kryesor i këtij përkeqësimi është rritja e taksave dhe detyrimeve, duke humbur plot 28 vende për këtë arsye. Raporti shprehet se 37.3% e fitimit shkon për taksa dhe kontribute, ndërkohë që qeveria zvarrit pafundësisht rimbursimin e TVSH- së. Fqinjët tanë vazhdojnë të kenë një renditje më
të mirë se sa Shqipëria, e cila renditet në vendin e 65. Maqedonia renditet në vendin e 11, Kosova në vendin e 40, Mali i Zi në vendin e 42, duke treguar përparësi krahasuar me Shqipërinë. Edhe këtë vit, ashtu si vitin e kaluar, mesazhi është shumë i qarte: Investitorët e huaj që duan të investojnë në Ballkan, e shohin Shqipërinë si zgjedhjen e fundit. Janë vendet fqinje ( Maqedonia, Kosova dhe Mali i Zi) të cilat do të jenë më të afta për të thithur investitorët e huaj", deklaroi kreu i PD- së.