Vrasja e avokatit, shqiptari: Doja vetëm ta trembja
Autori u gjet i fshehur në një kamp rom. Urdhri për ekzekutimin e viktimës u dha nga burgu i Koridhalosë Policia greke: 32- vjeçari mori 3000 euro parapagesë për krimin
Unë nuk doja ta vrisja avokatin Mihal Zafiropoulos, doja vetëm ta trembja". Kështu ka deklaruar dje gjatë marrjes në pyetje nga policia greke shqiptari 32- vjeçar, i cili dyshohet të jetë autori për vrasjen e avokatit të njohur më 12 tetor. Por, pavarësisht kësaj deklarate, mediat greke kanë nxjerrë dje detaje të reja në lidhje me krimin. Burime për "Gazeta Shqiptare" bënë me dije se shqiptarët e marrë në pyetje janë Albert Bako, Olti Dulçe dhe një tjetër me emrin Klodian. Ditën e djeshme u raportua se autori i vrasjes është një 32- vjeçar i arratisur nga burgu i Kasandrës. Mësohet se shqiptari kishte ikur me leje nga burgu, por nuk ishte kthyer më, duke kryer edhe krimin. Ndërkaq, thuhet se urdhri për vrasjen e avokatit grek ishte dhënë nga burgu i Koridhalosë. Po kështu, raportohet se shqiptari kishte marrë 3000 euro parapagesë për vrasjen. Ai u gjet në një kamp rom, ku i fshihej policisë pas krimit. Vrasja e avokatit grek, Mixalis Zafeiropoulos më 12 tetor në mes të Athinës ka vënë në lëvizje policinë e vendit fqinj. Në kuadër të këtij hetimi, siç mëson "Gazeta Shqiptare" janë marrë në pyetje tre të dënuar shqiptarë në burgun e Koridhalos, pasi kanë qenë më herët të përfshirë në një tentativë vrasjeje ndaj një tjetër avokati grek, të quajtur George Antonopoulos.
Pas rinisjes së hetimeve për vrasjen e avokatit grek, i ekzekutuar në mes të Athinës më 12 tetor, autoritetet greke kanë vënë në pranga një 32vjeçar shqiptar, i cili dyshohet se është autori i vrasjes së avokatit Mixalis Zafeiropoulos. Sipas mediave greke, policia bastisi shtëpinë e shqiptarit pasditen e së dielës në lagjen "Kallitha", ku u gjetën armë zjarri. 32- vjeçari ishte përpjekur të arratisej në Itali e Shqipëri, por nuk ia doli dhe u arrestua në Patra. Policia greke është në kërkim të dy bashkëpunëtorëve të tjerë të shqiptarit, të cilët dyshohen se janë përfshirë në vrasjen e Mixalis Zafeiropoulos. Emri i shqiptarit të arrestuar nuk bëhet me dije, ndërsa mësohet se është emër i njohur për autoritetet Helene. Mixalis Zafeiropoulos u vra në armën e tij ligjore më 12 tetor. Nga hetimet e deritanishme dyshohet se autorët kanë dashur ta trembin avokatin dhe t'i përcillnin atij një mesazh, por debati ka degraduar duke e qëlluar atë për vdekje. Të hënën policia mori në pyetje edhe 3 shqiptarë të tjerë, të cilët vuajnë dënimin në burgun e Koridhalos, si persona që mund të kenë dijeni për vrasësit e avokatit.