Basha: Bankat, transaksione të parave të trafikut të drogës
Rama kërkoi shkarkimin e Zgurit, kreu i PD: Gati të zhvishet lakuriq "Të ndalet projekti i 1 miliard eurove"
Kreu i opozitës Lulzim Basha akuzoi dje se paratë e krimit në Shqipëri po pastrohen përmes bankave, të cilat, siç tha ai, kryejnë transaksione në shuma të konsiderueshme, para këto të vëna nga veprimtari të paligjshme, si trafiku i drogës. Basha i ktheu përgjigje kryeministrit shqiptar Edi Rama, i cili tha se sistemi bankar është më i pastri pa asnjë penetrim të krimit dhe se në Shqipëri nuk ka pastrim parash. "Nuk ka dyshim se bumi i beftë i ndërtimit kur vendi është në krizë dhe ka mijëra apartamente të pa shitura, është rezultat i parasë që vjen nga droga. Nuk ka dyshim se ato koncesione që jep Edi Rama ku emrat e koncesionarëve fshihen në parajsa fiskale mund të jenë skema të pastrimit të parave të drogës. Nuk ka dyshim se koncesionet që Edi Rama i mban të fshehura mund të jenë pastrim i parave të drogës",- deklaroi kreu i PD- së. Z. Basha kujtoi raportin e Departamentit Amerikan të Shtetit që e vendosi Shqipërinë në listën e zezë të vendeve kryesore të pastrimit të parave në botë, e quajtur zyrtarisht Lista e Vendeve Kryesore të Pastrimit të Parave. Për Bashën vetë programi 1 miliard për rindërtim është pjesë e strategjisë së pastrimit të parave që u fituan nga trafiku i drogës.
"Depërtimi i krimit në ekonomi duhet ndalur tani. Projekti 1 miliard euro duhet ndalur tani. Çdo koncesion, çdo investim që përfshin qeverinë duhet të bëhet transparent në çdo detaj. Prokuroria e ndihmuar nga partnerët ndërkombëtarë duhet të hetojë pastrimin e parave dhe krimin e lidhur me të"- theksoi z. Basha. Raporti i Departamentit Amerikan të Shtetit dhe ai i Indeksit të Bazelit për z. Basha janë dëshmi e kthimit të Shqipërisë në vendin ku krimi e mafia po pastrojnë paratë e drogës. "Në mars 2017, Departamenti Amerikan i Shtetit e vendosi Shqipërinë në listën e zezë të vendeve kryesore të pastrimit të parave në botë, e quajtur zyrtarisht Lista e Vendeve Kryesore të Pastrimit të Parave. Në gusht të 2017 indeksi i Bazelit e renditi Shqipërinë në tre ndër vendet që pastrohen para",- deklaroi kreu i PD- së. Depërtimi i krimit në sektorin bankar, atë të ndërtimit dhe në projektin 1 miliard euro janë skema që Lulzim Basha thotë se kryeministri po përdor për pastrimin e parave të drogës, lidhje që sipas tij duhet të hetohen. Në kundërpërgjigje të thirrjes që kryeministri Rama i bëri sh-
qiptarëve për të mos i marrë seriozisht akuzat e opozitës, Basha i kujtoi denoncimet e Partisë Demokratike që sipas tij rezultuan të vërteta. "Herën e fundit që dëgjuam Ramën kur na tha të qeshnim, Shqipëria u kthye në
hambar droge dhe zonë të lirë të krimit. Tani po na fton përsëri të qeshim. Në fakt, është koha të shqetësohemi dhe t'i themi ndal Edi Ramës dhe krimit në politikë dhe në ekonomi", - theksoi z. Basha. I pyetur në
lidhje me qëndrimin e maxhorancës për shkarkimin e kryetarit të KQZ- së, Klement Zguri si dhe atë të kryebashkiakut të Mallakastrës Kapllanaj, Basha dha këtë përgjigje: "Rama është gati të zhvishet
lakuriq, për t'iu shmangur pyetjes pse e mbrojti Tahirin, nuk thotë asnjë fjalë për paratë e drogës dhe patentat e lundrimit të Tahirit të kapura, ka dy javë që hesht që t'i shmanget kësaj pyetje".