Përmbytjet në Greqi, 16 viktima, preken 100 familje shqiptare
Kryeministri grek shpall 3 ditë zie, mesazhe solidariteti nga vendet e BE Nga 23 të plagosurit, 12 trajtohen në spitale, një i humbur
6 viktima u shënuan nga katastrofa naty rore që goditi të mërkurën tre qyteza të Atikës Perëndimore, pranë Athinës. Nga kjo katastrofë u prekën edhe 100 familje shqiptare, bëhet e ditur në media. Situata paraqitet problematike në Athinë dhe Mandra, një zonë e populluar vetëm 27 kilometra larg kryeqytetit helen. Mësohet se në Mandra jetojnë 600 familje shqiptare, ku 100 prej tyre janë prekur nga përmbytjet. Ndërkohë, në Perama janë 430 familje shqiptare.
Të dëshpëruar dhe të shokuar janë banorët e Mandrës, Nea Perames dhe Elevsines pasi më shumë se 500 shtëpi dhe dyqane, 350 makina, 50 skafe, dhjetëra autobusë dhe mjete të rënda janë shkatërruar ose kanë pësuar dëme nga ujërat e rrëmbyera dhe balta. "Tani ne presim që dikush të vijë dhe të vlerësojë dëmet dhe të japin dëmshpërblim, sepse njerëzit nuk kanë para, po kalojnë një krizë",- tha Jannis Drakopulos, banor i Mandrës. Sipas meteorologëve, brenda tre orëve ra një sasi shiu e barabartë me reshjet që bien gjithë vitin në atë zonë. Nga 23 të plagosurit, 12 trajtohen ende në spitale, një person konsiderohet i humbur, ndërsa 15 psikologë përpiqen të ndihmojnë familjet e viktimave. Autoritetet vendore kanë urdhëruar që shkollat në zonën e goditur të jenë të mbyllura, ndërsa kanë shpallur gatishmëri të lartë pasi shërbimi sinoptik parashikon përkeqësim të motit në orët e ardhshme edhe në shumë zona të tjera të Greqisë.
Edhe njëherë në të gjithë vendin është hapur debati për veprat publike, zjarret që kanë shkatërruar terrenin, ndryshimin e paligjshëm të shtretërve të përrenjve dhe lumenjve si dhe ndërtimet pa leje që kanë ndodhur në dekadat e fundit. Kryeministri grek pasi shpalli tri ditë zie kombëtare dhe premtoi masa për të ndihmuar familjet dhe bizneset që kanë pësuar dëme. "Dua të shpreh trishtimin tim të thellë dhe ngushëllimet më të sinqerta familjeve të viktimave, si dhe të premtoj se do të qëndrojmë krah tyre, me të gjitha mjetet që kemi në dispozicion",- tha Tsipras, kryeministër i Greqisë. ' Është një kohë shumë e vështirë për të gjithë Greqinë',- tha ai duke premtuar se do të qëndrojnë pranë të dëmtuarve, me të gjitha mjetet e nevojshme, u shpreh kryeministri grek. Ndërsa një prokuror grek urdhëroi hetim urgjent për pasojat që sollën këtë tragjedi.
Kryebashkiaku grek tha në një intervistë se asgjë nuk ka mbetur më në zonën e Mandrës dhe i gjithë qyteti po mban zi për viktimat. Moti i keq ka goditur përsëri në Athinë të enjten. Rrugët në disa pjesë të kryeqytetit grek u kthyen në lumenj. Trafiku është ndërprerë në Athinën qendrore, për shkak të niveleve në rritje të ujit si rezultat i reshjeve të mëdha në zonë. Trafiku në Autostradën Kombëtare që lidh Athinën dhe Selanikun, gjithashtu, është ndërprerë. Vërshimet kanë goditur edhe qytetet e Janinës, Metsovos dhe Zitës. Mediat lokale kanë raportuar rënie gurësh dhe shumë baltë në shumë pjesë të rrjetit rrugor. Shërbimet Kombëtare Meteorologjike ( EMY) kanë paralajmëruar kushtet më të skajshme të motit edhe gjatë ditëve të ardhshme. Sipas raportimeve, reshjet e mëdha dhe stuhitë do të vazhdojnë, ndërkohë erëra të forta dhe stuhi e breshri janë parashikuar, gjithashtu. Mesazhe ngushëllimi i ka dërguar qeverisë greke presidenti i KE, Jean- Claude Juncker, ndërsa Qipro dhe Turqia kanë shprehur gatishmërinë për të ofruar ndihmën e tyre. "Turqia është e gatshme të ndihmojë Greqinë pas përmbytjeve vdekjeprurëse në Athinë" - ka deklaruar Ministria e Jashtme turke të enjten.