Transportonin 20 kg kanabis me makinë, arrestohen dy persona nga Tirana
"Ura e Muhurrit", shpallet në kërkim një tjetër
DIBËR - Policia e Dibrës ka sekuestruar një sasi prej 20 kg kanabis, ndërsa ka arrestuar në flagrancë dy persona dhe ka shpallur në kërkim një tjetër. Mësohet se gjatë operacionit të koduar "Ura e Muhurrit", u vunë në pranga 47- vjeçari Asllan Cani dhe 22- vjeçari Ervin L., të dy banues në Tiranë. Burime zyrtare nga Drejtoria e Policisë së Qarkut të Dibrës pohuan se specialistët e sektorit të Antidrogës në vijim të punës për evidentimin dhe goditjen e veprimtarisë kriminale në fushën e narkotikëve, gjatë orëve të mbrëmjes të së mërkurës kanë goditur një tjetër rast. Mbi bazën e informacioneve të marra në rrugë operative se dy shtetas po transportonin me një automjet lëndë narkotike në aksin rural Zall- DardhëMuhurr, menjëherë kanë organizuar punën për goditjen e këtij rasti. Si rezultat i ndërhyrjes së befasishme të policisë në vendin e quajtur "Ura e Muhurrit" është bërë ndalimi i automjetit tip "Suzuki", me targa AA 084 FS dhe me drejtues shtetasin Asllan Cani. Gjatë kontrollit në pjesën e bagazhit të automjetit janë gjetur dhe sekuestruar në cilësinë e provës materiale 2 thasë me lëndë narkotike me peshë totale 20 kg kanabis sativa. Në përfundim të veprimeve të para hetimore u bë kapja në flagrancë e 47- vjeçarit Cani dhe 22- vjeçarit Ervin L., të cilët akuzohen për veprën penale: "Prodhim dhe shitje të lëndëve narkotike" kryer në bashkëpunim. Ndërkohë, u shpall në kërkim policor shtetasi R. C., 29 vjeç, banues në Tiranë, i cili akuzohet për veprat penale: "Prodhim dhe shitje të lëndëve narkotike" kryer në bashkëpunim dhe "Mosbindje ndaj urdhrit të punonjësit të policisë". Në cilësinë e provës materiale u sekuestruan edhe dy aparate celularë dhe automjeti, me të cilin lëviznin tre personat e mësipërm. Materialet hetimore do t'i kalojnë prokurorisë pranë Gjykatës së Shkallës së Parë Dibër, për veprime të mëtejshme. en. do.