Skënderbeu merr një pikë mes polemikash në Vlorë
Shënojnë të parët vlonjatët me Bicajn, korçarët përgjigjen me Muzakën në minutën e 88- të Flamurtari kërkon një 11- metërsh, i anulohet një gol
Flamurtari ndal Skënderbeun në një takim të nxehtë të luajtur në Vlorë, por që në fund është mbyllur me rezultatin e barabartë 1- 1. Vlonjatët kërkonin të thyenin Skënderbeun pas një jave të mbushur me polemika dhe akuza për favorizime drejtuar korçarëve dhe federatës, ndërsa në shkallët e stadiumit atmosfera ishte e ndezur. Dhe si për t'i hedhur benzinë zjarrit në minutën e 23- të kemi një moment të dyshimtë në zonë, ku Juxhin Xhaja nuk vërshëllen një penallti në favor të vendësve pas ndërhyrjes të Micit ndaj Xhufos. Megjithatë, Flamurtari do ta gjejë golin e epërsisë në minutën e 38- të me Ditmar Bicajn, që mbi vijë fatale shtyn në portë topin e gjuajtur nga Sidibe. Skënderbeu do të reagojë edhe në minutën e 52të, por Takun e ndal një Nurkoviç i shkëlqyer. Në minutën e 82- të Flamurtari do të shënojë golin e dytë me anë të Bushiç, por kryesori Xhaja do anulojë pas sinjalizimit të anësorit për ndërhyrje të gabuar ndaj portierit Shehi. Një tjetër rast i dyshimtë, ky në dëm të vlonjatëve. Kur dukej se Flamurtari do të arrinte një fitore të madhe, del në skenë Vangjeli me krosimin e tij perfekt për kokën e Muzakës, që barazon rezultatin në minutën e 88- të, madje Skënderbeu mund ta kishte fituar ndeshjen nëse Tefik Osmani do të ishte treguar më i saktë në të 92'- ën. Gjithsesi, mbyllet 1- 1 në Vlorë, me Skënderbeun që ruan të njëjtën distancë largësie me Kukësin dhe Flamurtarin.
Trajneri i Flamurtarit, Shpëtim Duro, ka deklaruar se ekipi i tij meriton më shumë dhe se gjyqtarët kanë qenë pengesa e vetme, që skuadra të mos dilte me pikë të plota ndaj ekipeve kryesore të kampionatit. Në fjalën për "Super Sport", ai deklaroi se nuk besonte që do të merreshin penallti nga skuadra e tij këtë sezon. "Komplimente skuadrës për çfarë ka dhënë se kishim përballë një ekip si Skënderbeun. Skuadra ka bërë detyrën gjatë gjithë lojës, përballë kishim një skuadër që dihet forca. Por sot e meritonim patjetër fitoren, kemi shënuar, kontrolluar, kemi mbyl- lur hapësirat e kundërshtarit. Kam rezerva për gjykimin, nëse goli i dytë ishte i rregullt, kam mendimin që e kemi fituar takimin. As nuk diskutohet që është gol i rregullt. Është hera e dytë, edhe me Kukësin, edhe këtu. Penalltia? Nuk e di nëse ka qenë, nuk e di a do të kemi marrë ndonjëherë penallti dhe nuk besoj të marrim deri në fund të kampionatit. Çfarë të bëjë skuadër më shumë, nuk e kuptoj. Me Kukësin nuk jep penallti, anulon gol të rregullt, sot ( dje) prapë. Çfarë t'i kërkoj skuadrës? Shihet që skuadra ka luajtur shumë mirë në dy ndeshjet e fundit, duhej të merrnim më shumë. Nëse gjykimet do të ishin më të rregullta, do të kishim marrë më shumë. Jam i kënaqur, por i zhgënjyer për futbollistët dhe tifozët, se nuk është zgjedhje e mirë kjo e gjykimit".