Rama, trupave në Afganistan: Ajo çka bëni nuk ka të paguar
Xhaçka, mes ushtarakëve në mision
Mesazhe
mirënjohjeje dhe falënderimi i drejtoi kryeministri Edi Rama kontingjentit të ushtarakëve të Forcave tona të Armatosura në kuadër të misionit të NATO- s në Afganistan, teksa komunikoi dje në një lidhje të drejtpërdrejtë me ta në vend- dislokimin e tyre në Kabul, ku ndodhej edhe ministrja e Mbrojtjes, Olta Xhaçka. "Jemi mbledhur këtu, bashkë me një pjesë të miqve dhe aleatëve, me të cilët trupat shqiptare kontribuojnë këtu në Afganistan. Kemi marrë vlerësimet maksimale për përkushtimin dhe profesionalizmin e ushtarakëve tanë", - u shpreh Ministrja Xhaçka, duke theksuar gjithashtu se shërbimi i tyre nuk është vetëm në dobi të Afganistanit, por i shërben edhe stabilitetit dhe projektimit të sigurisë për të gjithë zonën euroatlantike. "Kam marrë shërbimin para 11 muajsh dhe dëshiroj t'u informoj se performanca e trupave tanë në Afganistan është e jashtëzakonshme. Kam pasur rastin të takoj komandantët e të gjitha niveleve, të cilët kanë shprehur vlerësimet e tyre maksimale për punën e personelit tonë", - tha një nga drejtuesit e kontingjentit në Kabul. Duke i falënderuar për kontributin e çmuar për sigurinë dhe performancën e lartë në detyrë, kryeministri siguroi se mbështetja e qeverisë ndaj tyre do të vijë duke u rritur. "Jemi shumë mirënjohës dhe shumë krenarë për këtë. Jam unë që duhet t'u falënderoj. Ne përpiqemi të bëjmë më të mirën. Sigurisht do të donim të bënim më shumë dhe më shumë do të bëjmë hap pas hapi, se mundësitë falë reformave dhe përpjekjeve të përbashkëta shkojnë duke u rritur, jo duke u zvogëluar. Por, fakti është që ajo çka ju bëni, nuk ka të paguar, - siç thotë populli, - për dinjitetin e vendit tonë dhe për nderin e flamurit tonë", u shpreh Rama.