DREJTUESIT E KULTURËS KËRKOJNË T'U KTHEHEN PARATË E BILETAVE
Në
seancën dëgjimore të mbajtur në Komisionin e Medias, drej tuesit e institucioneve kryesore kombëtare të kulturës në vend kanë kërkuar që të ardhurat nga shitja e biletave t'u kthehen në masën 90 për qind dhe jo 30 për qind sa është e parashikuar në ligj. Zana Çela, drejtore e Teatrit Kombëtar të Operës dhe Baletit, Hervin Çuli drejtor i Teatrit Kombëtar dhe Ledion Lako, drejtor i Muzeu Arkeologjik Durrës thanë se kthimi i të ardhurave do t'i bënte më të pavarur nga fondet buxhetore. Edhe këtë vit, Ministria e Kulturës ka pasur pak rritje në buxhet, por, siç shihej edhe nga projekt- buxheti që prezantoi Ministrja e Kulturës Mirela Kumbaro, rritja është e papërfillshme dhe pos kësaj, në atë fond, nuk janë parashikuar rritjet e rrogave për disa kategori, që i kushtojnë buxhetit një shumë të konsiderueshme. Kumbaro bëri me dije se nga trashëgimia dhe arti: të ardhurat në vitin 2013 kanë qenë 61 milionë lekë ndërsa në vitin 2017 149 milionë lekë. E megjithëkëtë, "Ministria e Kulturës përballet me një problem në përdorimin e këtyre të ardhurave nga ana institucioneve të varësisë, pasi tavanet që na vendosen nga Ministria e Financave, janë kundrejt të ardhurave të vitit 2013, ndërkohë që të ardhurat tona nga sektori i biletarisë janë rritur ndjeshëm që nga 2013". Në vijim të ankesës, thuhet se sikurse edhe në kërkesat e mëparshme, "Kërkojmë si ministri të rregullohet kjo anomali duke na u rritur tavani buxhetor për shpenzimet korrente sipas udhëzimit të përbashkët të të dyja ministrive të Financës dhe të Kulturës të vitit 2015, për përdorimin e biletave". Sipas Kumbaros, për buxhetin e vogël të Ministrisë së Kulturës, kjo nuk është një shumë e pakonsiderueshme, por bëhet fjalë për rreth 26,6 milionë lekë nga të cilat në programin e trashëgimisë 22,4 milionë lekë dhe në programin e Art& Kulturë 4,2 milionë lekë, shuma me të cilat Ministria e Kulturës ka për objektiv të ndërhyjë në mirëmbajtjen e këtyre objekteve dhe në përmirësimin e shërbimeve dhe të produksioneve artistike, në mënyrë që të gjenerojnë të ardhura akoma më të mëdha në vijim.