Financieri i "Habilajve", gjykata lë në burg Nazer Seitin
40- vjeçari mohon akuzat, kërkon ekstradim
TIRANE- Gjykata e Apelit të Krimeve të Rënda rrëzoi dje kërkesën e Nezar Seitit për të fituar lirinë duke lënë në fuqi masën e dhënë ndaj tij një javë më parë. Seiti, i njohur si "financieri" i grupit kriminal "Habilaj", do të vazhdojë të qëndrojë në qeli. Ndaj Seitit rëndon edhe masa e sigurisë arrest me burg me nga 20 ditë afat, për qëllim ekstradimi, masë kjo e dhënë nga shkalla e parë e Dhomës Penale në Tiranë. Por me vendimin e sotëm të Apelit të Krimeve të Rënda, ai mbetet në Shqipëri deri në përfundim të hetimeve. Sipas hetimeve të prokurorisë së Katanias, Seiti është personi që shpërndante fitimet që vinin nga aktiviteti kriminal i anëtarëve të grupit "Habilaj". Fiti- me të cilat përfitoheshin nëpërmjet trafikut të drogës nga Shqipëria drejt Italisë. Më herët Prokuroria e Krimeve të Rënda ka marrë në pyetje të dyshuarin si bashkëpunëtorin e ngushtë të Moisi Habilajt, Nezar Seitin. Marrja në pyetje ka ardhur pasi Krimet e Rënda kanë siguruar dosjen e Nezar Seitit, të ardhur nga prokuroria e Katanias. Krimet e Rënda e kanë pyetur Nezarin për përgjimet dhe rolin e tij në trafikun ndërkombëtar të drogës. Seiti ka pranuar para prokurorëve të Krimeve të Rënda se ka lidhje krushqie me Habilajt, pasi gruaja e tij i ka kushërinj. Gjithashtu, ai ka thënë se ka udhëtuar shpesh drejt Italisë në kërkim të punëve të ndryshme, dhe se kthehej shpesh në Shqipëri për të parë prindërit e moshuar, që banojnë në Vlorë. Lidhur me trafikun e drogës, dhe rolin e tij si bashkëpunëtor i Moisi Habilajt, Nezar Seiti ka mohuar akuzën duke preferuar të mos japë shpjegime. Ai ka kërkuar që të gjykohet në shtetin fqinj, ku janë ngritur akuzat e para, duke i thënë "po" ekstradimit.