Dewi van de Weerd: Ka mungesë vullneti për reformën në drejtësi
Ambasadorja e Holandës: Korrupsioni të luftohet nga qeveria
Ambasadorja
e Holandës në Shqipëri, Dewi van de Weerd tha dje se mungon vullneti për zbatimin e reformës në drejtësi. Sipas ambasadores holandeze, një nga proceset që po vonon reformën është moszgjedhja e anëtarëve të shoqërisë civile në Këshillin e Lartë të Prokurorisë dhe Këshillin e Lartë Gjyqësor. "Ne kemi arritur shumë sa i përket legjislacionit, por jemi në fazën kur zbatimi i reformës ka nisur. Shoqëria civile ka një rol të rëndësishme në ngritjen e institucioneve të drejtësisë dhe një nga proceset e vonuara është moszgjedhja e kandidatëve që vijnë nga Shoqëria Civile, arsyet mund të jenë të ndryshme, por për popullin shqiptar që beson në reformë duket si një mungesë vullneti për ta çuar procesin përpara", u shpreh ambasadorja holandeze. Ajo shtoi: "Ku ka vullnet, ka gjithmonë një zgjidhje dhe ne po flasim për një proces që po rihapet për herë të katërt sa u përket kandidatëve për KLP. Ne i duam këto organe për të shkuar më tej dhe për të thyer ngërçin aktual". "Shoqëria shqiptare nuk duhet që të dorëzohet, reforma në drejtësi është domosdoshmëri. Hapja e negociatave është e lidhur me reformën në drejtësi, e cila nuk është kalimtare. Është e nevojshme që duhet të ketë hapa konkretë për negociatat. Duhet të respektohen edhe të drejtat e njeriut. Korrupsioni mund të luftohet edhe nga ekzekutivi, jo vetëm nga reforma në drejtësi", tha ambasadorja. KLGJ dhe KLP nuk janë ngritur ende për shkak të mungesës së aplikantëve. Një ditë më parë, ministrja e Drejtësisë, Etilda Gjonaj tha se institucionet e reja të drejtësisë do të ngrihen menjëherë pas procesit të vetingut. Edhe kreu i shtetit informoi Kuvendin se nuk mund ta ngrite KED- në për shkak të vakumit ligjor.