Vasili, Ramës: Fol për 2 miliardë eurot, kurseju shqiptarëve një ' 97 tjetër
Kreu i grupit të LSI- së akuzon kryeministrin për humbjet në Arbitrazh
Kryetari
i grupit parlamentar të LSI- së, Petrit Vasili i kërkoi dje kryeministrit Edi Rama t'u kursejë shqiptarëve një vit tjetër 1997. Në një postim në rrjetin social "Facebook", Vasili u shpreh: "Kryeministër, boll u trembe, fol për 2 miliardë eurot, kursejua shqiptarëve një ' 97 të dytë! Skandali i 2 miliardë eurove është më i rëndi që mund të imagjinohet. Kryeministri e ka prej kohësh në tavolinë. Kryeministri nuk flet nga frika e madhe për pushtetin e tij, sepse e di mirë që ky skandal i 2 miliardë eurove e rrëzon për 24 orë", tha më tej Vasili. Sipas tij, "kryeministri është përgjegjës direkt për disa nga këto gjyqe, pasi i ka frymëzuar e mbështetur personalisht veprimet antiligjore dhe për dëmin kolosal financiar që ka ardhur prej këtyre veprimeve. Skandalin nuk e ka zbuluar opozita, por Avokatura e Shtetit, e cila e ngriti me shumë të drejtë dhe përgjegjshmëri këtë aferë gjigante. Humbja e 2 miliardë eurove është një tragjedi me dimensione politiko- shoqërore të ngjashme me tragjedinë e vitit ' 97", theksoi Vasili. "Kryeministri lodhet kot duke u fshehur. Të gjithë e dinë që kur të ndodhë kjo tragjedi, kryeministri do të ike dukë i lënë pas zjarrin Shqipërisë, njëlloj si ata që në ' 97, pasi i vunë zjarrin, ikën nga vendi. Shqipëria dhe shqiptarët lënguan për vite të tëra pasojat e ' 97. Ndaj kryeministri nuk ka asnjë të drejtë që të heshtë më, sepse Shqipëria nuk është pronë e tij. Kryeministër, kurseja Shqipërisë një ' 97 të dytë", u shpreh Vasili.