Miratohet fondi 2.5 milionë euro për mbjelljen e pishave, debate në këshill

PD nuk është e pranishme, LSI nuk e voton vendimin

Gjithashtu,

Këshilli Bashkiak i Tiranës miratoi projektin për mbjelljen e pishave në autostradën Tiranë- Durrës. Këshilltarët e Partisë Demokratike u larguan përpara fillimit të votimit për rendin e ditës, në një kohë që ky projekt u miratua me 31 vota pro. Nënkryetari i Bashkisë së Tiranës, Arbjan Mazniku tha se palmat e thara do të zëvendësohen me mbjelljen e pishave të buta. Por, anëtarët e LSI në këshillin bashkiak nuk e votuan vendimin, pasi sipas tyre, ky investim 2.5 milionë euro mund të shkonte për punët më të rëndësishme të kryeqytetit. Pas largimit nga salla ku po votoheshin çështje jashtë rendit të ditës, kreu i këshilltarëve të PD në Këshillin Bashkiak të Tiranës, Kreshnik Çollaku, u shpreh se historia e palmave është një aferë e pastër korrupsioni dhe një aferë e rëndë për xhepat e qytetarëve. Sipas tij, qytetarët e Tiranës duhet të dinë se kosto e një palme ka qenë mbi 5 mijë euro dhe për më tepër këto palma u thanë. "Vetëm një pishë kushton 5 milionë lekë. Imagjinoni se sa vakte ushqimore për fëmijët, sa shkolla do të ishin ndërtuar apo rehabilituar në rast se këtyre oligarkëve dhe këtyre njerëzve totalisht pa asnjë lloj shenje përgjegjësie në interes të qytetarëve, nuk do t'i kishin rezistuar tundimit për të vjedhur e grabitur", - u shpreh Çollaku. Më tej, ai theksoi se ky vendim është një absurditet i radhës, pasi nga taksat e qytetarëve të Tiranës po shkulen palma e po ngulen pisha, fondi për të cilat do të jetë plot 2.5 milionë euro.