Olta Xhaçka: Shqipëria mbështet Kosovën për anëtarësimin në NATO

Shqipëria

do të mbështesë Kosovën në proceset e anëtarësimit në organizata ndërkombëtare, përfshirë edhe NATO- n", deklaroi dje, në Prishtinë ministrja e Mbrojtjes, Olta Xhaçka. Gjatë një takimi me kryeministrin e Kosovës, Ramush Haradinaj, Xhaçka theksoi se "Shqipëria do të jetë mbështetëse e fuqishme për Republikën e Kosovës, për forcimin e subjektivitetit ndërkombëtar të saj". Xhaçka, vlerësoi dinamikën e re qeverisëse të kryeministrit Haradinaj, thuhet në njoftimin për shtyp të qeverisë kosovare. Haradinaj dhe Xhaçka biseduan për zhvillimet aktuale politike dhe bashkëpunimin bilateral ndërmjet të dyja shteteve, me fokus të veçantë mbrojtjen dhe sigurinë. Kryeministri vlerësoi kontributin e Shqipërisë në sigurinë rajonale dhe globale si anëtare e NATO- s, që ka ndikim edhe për sigurinë e Kosovës. "Kosova mbështet te përvojat shqiptare në procesin e anëtarësimit në këtë institucion shumë të rëndësishëm të sigurisë globale",- nënvizoi Haradinaj. Haradinaj theksoi rëndësinë e bashkëpunimit mes Kosovës dhe Shqipërisë si dhe mundësinë e thellimit të mëtejshëm në të gjitha fushat e interesit të përbashkët. Gjatë takimit u bisedua edhe për mbledhjen e përbashkët të dy qeverive, e cila do të mbahet në 27 nëntor në Korçë, për arritjen e marrëveshjeve konkrete dhe zbatimin e tyre, me qëllim thellimin e marrëdhënieve bilaterale. Ministrja e Mbrojtjes u prit edhe nga Presidenti Hashim Thaçi. Kosova po mëson nga përvoja 105 vjeçare e Shqipërisë, ka deklaruar në takim, Presidenti i Kosovës, Hashim Thaçi. Presidenti Thaçi ka theksuar se Kosova ka mbështetjen e Shqipërisë në botë dhe se anëtarësimi i rajonit në Aleancën Veri- Atlantike është vetë siguria e rajonit. Nëpërmjet një postimi në statusin e tij social "Facebook", Presidenti i Kosovës Thaçi në vijim shprehet se "Ne kemi mbështetjen e saj kudo në botë. Ndamë bindjen e njëjtë me ministren e Mbrojtjes së Shqipërisë, se anëtarësimi i shteteve të rajonit në Aleancën Veri- Atlantike do u jepte fund të gjitha problemeve të sigurisë në rajonin tonë.