Sot, mbledhja Kosovë- Shqipëri, do të nënshkruhen 12 marrëveshje
Më 28 Nëntor të dy kabinetet do të jenë në Vlorë për Festën e Pavarësisë Mbledhja e 2 qeverive shënon hapjen e "Vitit të Skënderbeut"
Qeveria e Kosovës dhe ajo e Shqipërisë pritet të nënshkruajnë sot, rreth 12 marrëveshje bashkëpunimi mes dy shteteve. Ashtu siç ishte planifikuar, sot pritet të nisë në qytetin e Korçës mbledhja e dy kabineteve, e cila mbahet në shenjë simbolike me rastin e Festës Kombëtare të Pavarësisë. Mbledhja do të zhvillohet në dy ditë. Kështu ditën e parë në Korçë mbledhja nis në orën 16: 00 dhe do të zgjasë 90 minuta, do të mbyllet me një konferencë të përbashkët për shtyp të kryeministrave Rama e Haradinaj. Ministrat e kabineteve ' Rama' dhe ' Haradinaj', do të firmosin një memorandum bashkëpunimi mes Ministrive të Mjedisit, për Mbrojtjen dhe Zhvillimin e Mjedisit, një tjetër memorandum për bashkëpunimin në fushën e kulturës, marrëveshje dhe memorandume për bashkëpunimin për diasporën dhe një protokoll teknik mes dy Ministrive të Bujqësisë për njohjen bilaterale të certifikatave veterinare për produktet shtazore mes dy vendeve. Gjithashtu, do të firmoset një memorandum mirëkuptimi mes agjencisë AIDA dhe homologes kosovare KIESA, për nxitjen e investimeve, një memorandum mirëkuptimi në fushën e energjisë elektrike mes dy Ministrive të Energjetikës, marrëveshje për njohjen e kontributeve shoqërore dhe marrëveshje bashkëpunimi mes Ministrive të Jashtme, në kuadër të integrimit europian. Ndërkohë ditën e dytë, të dy kabinetet do të zhvendosen në Vlorë, ku do të marrin pjesë edhe në festimet e 105vjetorit të Pavarësisë së Shqipërisë. Mëngjesin e datës 28, në ditën e festimeve të 105- vjetorit të Pavarësisë, 2 kabinetet qeveritare nisen drejt Vlorës ku në mesditë do të marrin pjesë në ceremoninë e ngritjes së Flamurit dhe do të kryejnë homazhe në monumentin e Atit të Pavarësisë, Ismail Qemal bej Vlorës, ceremoni që kryesohet nga Presidenti i Republikës, Ilir Meta. Po në Vlorë, në Shtëpinë Muze do të zhvillohet një aktivitet i përbashkët, ku do të shpallet dhe logo zyrtare e Vitit Mbarëkombëtar i Skënderbeut dhe ku 2 kryeministrat dhe presidenti Meta është parashikuar të mbajnë fjalime. Mbledhja e 2 qeverive shqiptare shënon dhe hapjen zyrtare të Vitit të Skënderbeut me rastin e 550- vjetorit të vdekjes së heroit kombëtar. Edhe kryeministri Edi Rama, e ka deklaruar gjatë vizitës së kryeministrit të Kosovës, Ramush Hardinaj se ky vit duhet të shërbejë për të bashkuar shqiptarët dhe si motiv për një të ardhme të ndritur. Kjo është mbledhja e katërt e dy qeverive, që kur në pushtet ka ardhur Edi Rama. Mbledhja e parë u zhvillua në Prizren më 11 janar 2014, ku në atë kohë kryeministër i Kosovës ishte Hashim Thaçi. Mbledhja e dytë e përbashkët u zhvillua më 23 mars 2015, këtë herë në Tiranë, ku qeveria e Kosovës prezantohej me Isa Mustafën. Në 3 qershor 2016 dy qeveritë u mblodhën përsëri, për të tretën herë, këtë radhë në Prishtinë dhe nesër do të mblidhen në Korçë dhe kësaj herë kryeministri shqiptar Edi Rama do të ketë në krah homologun Ramush Haradinaj. Pas axhendës së ditës, dy delegacionet do të nisen për në Tiranë, ku do të marrin pjesë në pritjen që organizohet nga Presidenti i Republikës, me rastin e Festës Kombëtare. Edhe qeveria e Kosovës ka shpallur ditën e 28 Nëntorit, si festë kombëtare dhe ditën e shqiptarëve.