Olta Xhaçka: Një mijë jetë të shpëtuara nga dora e shqiptarit

Kthehet anija "Oriku" nga deti Egje

Anija

"Oriku" pjesë e Flotës Detare Shqiptare është kthyer në atdhe pas një viti qëndrimi në detin Egje, pjesë e operacionit të NATO- s "AEGEAN SEA". Nga 21 nëntori i vitit të kaluar e deri tani, gjashtë ekuipazhet e anijes "Oriku", P- 132, kanë marrë pjesë në dhjetëra operacione në detin Egje, në kuadër të përpjekjeve ndërkombëtare për të ndaluar trafikimin ilegal dhe migrimin në këtë rajon të trazuar. Rezultat i këtyre operacioneve është dhënia e ndihmës dhe shpëtimi i rreth 1 mijë personave të moshave, gjinive e shtetësive të ndryshme, siriane, nigeriane, irakiane, somaleze, jemenase, kongoleze etj., të cilat nga brigjet e Turqisë do kalonin për në brigjet greke apo vende të tjera të BE. Në ceremoninë e organizuar në Portin e Durrësit, ministrja e Mbrojtjes, Olta Xhaçka tha se, prania e anijes "Oriku" në detin Egje është shembulli më i mirë i lënies pas të çdo retorike, kur vjen fjala për të shërbyer në një mision NATO. "Dhe çfarë suksesi! Njëmijë jetë të shpëtuara gjatë këtij viti, një mijë njerëz që falënderojnë flamurin e kuq me shqiponjën dykrenore. Falënderojnë e kujtojnë të gjithë ju, ushtarakë të Forcës sonë Detare, se u zgjatët dorën e shpresës dhe dritën e jetës, aty ku terrori i luftës dhe mungesa e së ardhmes, detyroi një kolonë të madhe njerëzore drejt eksodit larg nga Siria e Iraku",- tha ministrja në fjalën e saj. Ajo ka vlerësuar kontributin e të gjithë efektivëve shqiptarë në të gjitha misionet paqeruajtëse ku Shqipëria merr pjesë, siç janë ato në Afganistan e Kosovë, të cilat ministrja Xhaçka i vizitoi gjatë javës që kaloi. Shqipëria do të zgjasë me një vit qëndrimin e saj në detin Egje dhe së shpejti drejt operacionit do të niset anija "Butrinti" me 17 anëtarë të ekuipazhit.