Gomonia me 1.6 tonë kanabis, gjykata e Pireut në Greqi lë në burg 3 skafistët
Policia e Shtetit nis kontrollet e banesave, ja emrat e tre trafikantëve shqiptarë Shqiptari: S'kam lidhje me drogën, isha ngarkues
Pesë ditë pas kapjes së gomones me 1.6 tonë drogë, e nisur nga Himara dhe arrestimit të 11 personave në kuadër të këtij operacioni, gjykata e Pireut në Greqi, dha dje masën e sigurisë për tre nga trafikantët. Gjykata la masën arrest me burg pa afat për tre të pandehurit të përfshirë në trafikun e drogës. Trupa gjykuese vendosi masën e sigurisë për dy shqiptarë dhe një italian. Gjithashtu, televizioni publik grek, ERT njoftoi se dje tre nga trafikantët që u kapën brenda gomones 12 metra, një shqiptar, një italian dhe një bullgar janë dërguar në prokurorinë e Pireut për t'u marrë në pyetje. Bëhet me dije se dëshmitë e tyre do të jenë vendimtare për të zbardhur më shumë detaje nga kjo ngjarje. Mësohet, gjithashtu, se ditën e sotme dhe nesër do të dërgohen në prokurori për të dëshmuar edhe 8 persona të tjerë. Sakaq autoritetet policore shqiptare kanë kryer kontrolle në banesat e gjashtë shqiptarëve të arrestuar në Greqi si të përfshirë në trafikun e drogës.
SEANCA GJYQËSORE
Gjatë seancës gjyqësore të zhvilluar dje në gjykatën e Pireut në Greqi, u dha masa e sigurisë arrest me burg pa afat për tre nga trafikantët e përfshirë në organizatën kriminale të drogës. Përpara trupës gjykuese një nga shqiptarët ka mohuar të ketë lidhje me drogën, pasi sipas tij ishte marrë në punë për ngarkim- shkarkim, pa pasur dijeni se çfarë ngarkese ishte. "Më thanë: Eja të shkarkosh disa gjera nga një skaf,nuk kam lidhje me drogën",ka thënë ai. Ndërkohë sipas prokurorisë së Pireut, italiani i përfshirë në trafikun e drogës ishte në rolin e organizatorit. Akuzë e cila u mo-
hua nga ky i fundit. "Kisha marrëveshje thjesht për drejtimin e skafeve Skipper nga Greqia në Itali"- ka thënë italiani në seancën gjyqësorë. Pasi dëgjoi palët, gjykata e Pireut ka lënë në burg 2 shqiptarët dhe italianin. Ndërkohë gjykata e Pireut pritet të japë sot masën e sigurisë për një italian dhe dy shqiptarë të tjerë dhe të premten për pjesën e mbetur.
KONTROLLET E BANESAVE
Në kuadër të këtij operacioni, kanë rënë në pranga 11 persona, mes të cilëve 6 shqiptarë, 2 italianë, 2 grekë dhe 1 bullgar. Mediat greke, referuar burimeve nga
hetuesit, kanë publikuar emrat e 3 shqiptarëve, të cilët kanë rënë në pranga. Bëhet fjalë për Arban Baxheri nga Saranda, Ervis Çaushaj nga Përmeti si dhe Emiliano Kola nga Vlora. Gjithashtu, dyshohet se pjesë e grupit është edhe një person tjetër me inicialet B. K. nga fshati Zhepovë i Përmetit. Për këtë të fundit ende nuk ka të dhëna të sakta, por mësohet se policia është vënë në kërkim të tij. Ndërkohë burime konfidenciale bëjnë me dije se për rastin në fjalë është informuar policia e Sarandës, e cila ka kryer kontrolle në banesat e gjashtë shqiptarëve të ar-
restuar në Greqi. Mësohet se gjatë kontrollit në banesën e të pandehurit Emiliano Kola, nuk janë gjetur të dhëna komprometuese. Ndërsa policia ka konstatuar se familja e Ervis Çaushti, nuk jeton në Përmet prej kohësh dhe nuk kishte asnjë banesë në pronësi. Ai dhe familja e tij rezultojnë të jenë larguar në Greqi pak vite më parë. Sakaq mësohet se i pandehuri Arban Baxheri, 32 vjeç është i martuar dhe ka një fëmijë dhe njihet në qytetin bregdetar si pronar i një dyqani celularësh, por aktualisht në emër të tij nuk rezulton asnjë biznes. Ndërkohë, Baxheri është një emër i njohur për policinë e Sarandës. Ai është shoqëruar disa herë për dyshime që lidhen me përfshirjen e tij në trafikun e drogës, por më pas është lënë i lirë. Në 18 gusht 32- vjeçarit iu bë pritë afër banesës në Sarandë nga tre persona që e goditën në sy të djalit të tij, me shkop bejsbolli dhe thikë pranë zemrës. Baxheri mori plagë të rënda dhe pasi u mjekua në Sarandë u transportua në Janinë. Dyshimet për këtë rast kishin të bënin me konfliktet për pazaret e drogës. Tre autorët, të cilët plagosën Baxherin u lanë të lirë nga gjykata.