Dita e Çlirimit, Rama e Meta bashkë në homazhe para memorialit "Nënë Shqipëri"
Të majtët nderojnë dëshmorët e rënë për lirinë e vendit, mungon PD LSI e ndarë nga PS, Kryemadhi: Të reflektojmë
Tre krerët e lartë të sh tetit, Presidenti Ilir Meta, Kreu i Kuvendit Gramoz Ruçi dhe Kryeministri Edi Rama nderuan dje, së bashku dëshmorët e vendit, më rastin e 73- vjetorit të çlirimit. Rama, Ruçi, kreu i Bashkisë së Tiranës, Erion Veliaj e ministrat kanë pritur për pak momente deri sa t'u bashkohej Meta në Varrezat e Dëshmorëve dhe më pas kanë vijuar sipas protokollit me vendosjen e kurorave me lule dhe përkuljen përpara memorialit "Nënë Shqipëri". Në këtë ceremoni munguan përfaqësuesit e opozitës, të cilët prej vitesh e festojnë Ditën e Çlirimit në 28 Nëntor, bashkë me festën e Pavarësisë. As Rama dhe as Meta nuk folën pas homazheve për mediat, ndërsa më herët në mëngjes secili prej tyre uroi 29 Nëntorit. "Të dashur miq! Sot është dita e mirënjohjes për të gjithë partizanët, dëshmorët e heronjtë e Luftës Antifashiste Nacionalçlirimtare që sakrifikuan gjithçka për çlirimin e Shqipërisë",- shkroi dje, Meta në rrjetin social. Edhe kryeministri Rama duke njoftuar për aktivitetet që do të ndodhnin në Tiranë gjatë ditës tha se "73- vjetori i Çlirimit të Atdheut është mundësi e rrallë për të reflektuar mbi sensin e angazhimit dhe solidaritetit për të tjerët, për Shqipërinë!"
LSI
Ndërkohë, Lëvizja Socialiste për Integrim u shkëput sot, nga opozita me Partinë Demokratike. Por, drejtuesit e kësaj partie nuk iu bashkuan ceremonisë shtetërore, ku ishte edhe Partia Socialiste, por erdhën më pas për të kryer respektin ndaj dëshmorëve të rënë. Kryetarja e LSI- së, Monika Kryemadhi, shoqëruar nga kryetari i Grupit Parlamentar, Petrit Vasili si dhe kryetarja e LRI- së, Floida Kërpaçi zhvilloi homazhet në varrezat e "Dëshmorëve të Kombit". Kryetarja e LSI- së Monika Kryemadhi tha se 29 Nëntori është një ditë e shënuar për të gjithë shqiptarët. Kryemadhi duke iu referuar betejës së madhe të popullit shqiptar tha se nuk ka rëndësi numri, por dëshira, përkushtimi, vullneti dhe zemra për të fituar beteja të rëndësishme. "Ne sot nderojmë sakrificën e 28 mijë dëshmorëve, të cilët aspironin për një Shqipëri moderne, aspironin për një Shqipëri të begatë edhe pse jo të gjitha dëshirat e tyre janë të realizuara, motivimi ynë mbetet që këto dëshira dhe këto ëndrra të tyre t'i çojnë më tej brezat e rinj",tha kryetarja e LSI- së, Monika Kryemadhi. "Historia e vjetër e botës, por edhe historia jonë e re tregon edhe njëherë që mjafton të kesh dëshirën dhe përkushtimin në zemër për të arritur atë që do",- tha kryetarja e LSI- së. "Besoj te dëshira, përgjegjësia, reflektimi i secilit nga ne që këto data të shënuara si 28- 29 Nëntori të jenë ditë reflektimi për klasën politike shqiptare për të çuar deri në fund amanetin e të gjithë atyre djemve dhe vajzave që dhanë jetën për lirinë e Shqipërisë dhe mbi të gjitha për të krijuar atë Shqipëri të cilën kanë ëndërruar me qindra dhe mijëra vite shqiptarët",- tha ajo. Nën moton "Rrugëtojmë nën një flamur", Bashkia e Tiranës mblodhi dje në bulevardin e ri, me rastin e festës së Ditës së Pavarësisë, motoristë nga Shqipëria dhe Kosova, të cilët dhuruan një shfaqje për të gjithë të apasionuarit pas mjeteve sportive. Kreu i Bashkisë së Tiranës, Erion Veliaj theksoi se bashkimi mes njerëzve është më i rëndësishmi dhe nëse shqiptarët bashkëpunojnë, atëherë asgjë nuk mund t'i ndajë ata.