Emergjencat Civile: Shirat mund të shkaktojnë përmbytje, më të rrezikuara Fieri dhe Vlora
Reshjet, prezente nga 30 nëntori deri më 4 dhjetor
TIRANË - Emergjencat Civile paralajmërojnë se mund të ketë përmbytje në disa zona të vendit, për shkak të reshjeve të shiut, që priten të nisin mëngjesin e ditës së sotme. Përmes një njoftimi për mediat, EC bëjnë me dije se janë marrë masa emergjente për situata të pritshme të parashikuara nga IGJEUM dhe institucionet ndërkombëtare të monitorimit të përmbytjeve për Evropën, të cilat parashikojnë reshje shiu me intensitet të lartë.
Sipas Institutit të Gjeoshkencës, Energjisë, Ujit dhe Mjedisit ( IGJEUM), por edhe nga shërbimet meteorologjike që bashkëpunojnë me Emergjencat Civile, informohemi paraprakisht se moti në të gjithë territorin e vendit gjatë datës 30 nëntor deri më 4 dhjetor 2017, do jetë drejt përkeqësimit dhe priten reshje shiu me intensitet mesatar deri dhe me intensitet të lartë, të cilat mund të krijojnë mundësinë e përmbytjeve. Përgjatë këtyre ditëve priten reshje shumë intensive, pothuajse në të gjithë territorin, por edhe jashtë kufijve shtetërore në basenin e lumit Vjosa. Reshjet maksimale i kalojnë vlerat e 100 mm në 24 orë. Nga llogaritjet paraprake, këto reshje priten të sjellin përmbytje në lumenjtë e mëdhenj, përveç vërshimeve të lumenjve të vegjël dhe përmbytjeve urbane në varësi të gjendjes së kanalizimeve në qytetet kryesore ( Tiranë, Lezhë, Durrës, Korçë, Berat, Vlorë, Fier dhe Gjirokastër). Qarqet më të rrezikuara janë Fieri dhe Vlora. Ka mundësi të lartë për përmbytje në basenet e lumenjve Vjosa dhe Seman. Gjithashtu, edhe lumi Shkumbin mund të shfaqë përmbytje përgjatë fundit të ditës së premte. Efektet e rëndësishme të përmbytjeve në pjesët fushore të qarqeve Vlorë dhe Fier parashikohet se mund të ndodhin në pjesën e parë të ditës së shtunë, 2 dhjetor 2017. Në pjesët e sipërme të këtyre baseneve në qarqet ( Gjirokastër, Berat, Elbasan) përmbytjet mund të ndodhin përgjatë ditës së premte, 1 dhjetor 2017.
Për sa më sipër, Drejtoria e Përgjithshme e Emergjencave Civile udhëzon në mënyrë të veçantë të gjithë prefektët e qarqeve, drejtuesit e bashkive, drejtuesit e institucioneve qendrore rajonale dhe vendore për marrjen e masave urgjente për sigurimin e kushteve për jetën normale të komunitetit.