Debati, Berisha: Të vijë Rama. Balla: Po bën pakt me Bashën!
Kuvendi voton me konsensus kundër dhunës ndaj grave, 111 vota pro rezolutës Ish- kryeministri: Tre agresorët brutalë
Kuvendi miratoi mbrëmë me konsensus mes mazhorancës dhe opozitës rezolutën e paraqitur nga PD- ja për dhunën ndaj grave. 111 deputetë votuan pro saj me asnjë votë kundër. Në seancën e posaçme plenare për dhunën ndaj grave, dje munguan kryeministri Edi Rama dhe kreu i opozitës Lulzim Basha, por edhe pa praninë e tyre, deputetët nuk shmangën dot debatin e ashpër mes tyre. Protagonistë ishin ish- kryeministri Sali Berisha dhe kreu i deputetëve socialistë Taulant Balla, të cilët e nisën seancën me batuta dhe ironi teksa flitej për "dënimin e fenomenit të dhunës në familje dhe marrjen e masave urgjente për evidentimin e situatës dhe gjetjen e mekanizmave efikas ligjorë për parandalimin e këtij fenomeni". Në nisje të seancës, ish- kryeministri Sali Berisha kërkoi prezencën e Ramës në Kuvend, duke e akuzuar atë se ka dhunuar gratë. "Ai që mbahet për mizoken nuk është këtu, por nxin edhe me mosqenien këtu. Duhet të jetë këtu dhe të kërkojë falje Violeta Manushit për ato që i ka thënë, ku është?"- tha Berisha. Por i menjëhershëm ishte reagimi i kreut të Grupit Parlamentar të Partisë Socialiste, Taulant Balla, i cili iu përgjigj me ironi Berishës, se Rama ndodhet me Bashën në Bruksel, ku po bëjnë marrëveshje. "Është në Bruksel me Lulzim Bashën dhe po bëjnë marrëveshje",- iu drejtua Balla, Berishës. Ish- kryeministri vuri në dukje se krahas murit të patriarkisë, tre janë agresorët më brutalë ndaj gruas shqiptare. Së pari, largimi masiv i burrave dhe djemve në emigracion. Së dyti, droga dhe së treti, vjedhja masive e fondeve. "Unë jam sot për të paraqitur një nga rastet më flagrante të vjedhjeve të 220 milionë eurove të vërtetuara. Ju bej thirrje ju, de- putetë të PS, t'i marrin këto dokumente dhe të më thonë se cilat fjalë dhe shifra mund ta justifikojnë. Afera është më plehrë se çdo plehrë. Në kohën e përmbytjeve, kjo qeveri me Ramën dhe Arben Ahmetajn, brenda një dite bëjnë nëntë veprime të kundërligjshme dhe ia japin tenderin një famozi, Klodian Zoto, njeriut të Ahmetajt. Ky zotëri e merr me 22 milionë djegësin e Elbasanit, po ky zotëri e shet koncesionin me 16 milionë euro një ital- iani dhe fut në xhep, 7 milionë euro nga taksapaguesit shqiptarë. Unë ju them ju se kjo nuk ndodh kurrë nëse nuk është kryeministri dhe ministri i financave nuk janë në tavë dhe vjedhin si ujqër të pangopur taksat e sh- qiptarëve. Më ka thënë një mik i shquar amerikan, avokat, kam pasur shumë miliarderë hajdutë për t'i mbrojtur në gjyq, dhe nuk kishte asnjë prej tyre që nuk donte të vidhte miliardin tjetër. Nga djegësi i Elbasanit tek djegësi i Fierit, ia dhanë prapë Klodian Zotos me 28 milionë euro. Po çfarë bëri ai, ia shiti italianit me 15 milionë euro. Dhe tani me këtë në Tiranë. Në kundërshtim flagrant me çdo lloj procedure",- theksoi z. Berisha.