50 ditë të tjera burg për financierin e Habilajve
TIRANE - Gjykata e Tiranës ka shtyrë me 50 ditë të tjera afatin e masës "Arrest në burg" për qellim ekstradimi të Nezar Seitit. Ky i fundit kërkohet nga drejtësia italiane pasi dyshohet si financier i grupit të Habilajve. Seiti kërkoi shuarje të masës së sigurisë, për shkak të përfundimit të afatit 20 ditor, ndërkohë që shtyrja e re me 50 ditë është ankimuar në Apel. Më herët ndaj Seitit janë dhënë dy masa me afat nga 20 ditë për arsye ekstradimi dhe një masë "Arrest me burg" për hetimin e tij nga Krimet e Rënda. Më herët Seiti ka shfaqur vullnetin për t'u ekstraduar në Itali, ku kërkon të përballet me akuzat e trafikimit të drogës nga Shqipëria në drejtim të Italisë. Sipas hetimeve të prokurorisë së Katanias, Seiti është personi që shpërndante fitimet që vinin nga aktiviteti kriminal, jo vetëm mes anëtarëve të grupit "Habilaj", por edhe bashkëpunëtorëve që ndihmonin në realizimin e trafikut të narkotikëve, apo armëve. Gjithashtu, më herët, Nezar Seiti ka shpjeguar përpara oficerëve gjyqësore lidhjen e tij me familjen Habilaj. Ai ka treguar se më Habilajt bashkëshortja e tij i ka kushurinj. "Me shtetasit Artan, Moisi dhe Florian Habilaj, kam lidhje krushqie, pasi bashkëshortja ime i ka kushërinj. Moisiu më vizitoi kur kreva një ndërhyrje në Itali. Vëllezërit i kam takuar kur jam kthyer në Shqipëri. Me Moisiun dhe Florianin takohem rrallë, ndërsa me Artanin me shpesh",- ka shpjeguar Nezar Seiti. I arrestuar mbrëmjen e 19 tetorit, më herët Seiti ka rrëfyer para prokurorëve se prej vitesh jetonte dhe punonte në Itali, por vinte shpesh në Shqipëri, për të vizituar prindërit në fshatin Gjorm. Për këtë shkak u gjend në Vlorë, ku dhe u arrestua për llogari të prokurorisë së Katanias, me akuzën e trafikut të drogës në bashkëpunim.