‘ Kryeprokurori’, Halimi: Doni ta zgjidhni për Vitin e Ri. Manja: Jeni antievropianë
Debate në Komisionin e Ligjeve, PD- LSI ikin nga mbledhja: Jeni në panik Kuvendi hap procesin: 5 ditë kohë për aplikantët
Komisioni i Ligjeve hapi dje garën për vendin e Prokurorit të Përgjithshëm të Republikës, pas përfundimit të mandatit të Adriatik Lallës. Anëtarët e këtij komisioni kanë debatuar për gati tri orë, por në fund deputetët e opozitës janë larguar nga salla e mbledhjes. Ndaj edhe vendimi u miratua vetëm me 10 votat e deputetëve të PS- së, në Komisionin parlamentar të Ligjeve. Sipas vendimit të publikuar në faqen e Kuvendit, brenda 5 ditëve që përfshijnë dhe tri ditët e pushimit zyrtar, deri të martën të gjithë prokurorët që besojnë se plotësojnë kriteret mund të aplikojnë pranë Komisionit të Ligjeve për të qenë kryeprokuror. Këta kandidatë duhet të kalojnë me sukses vetingun, duhet të mos preken nga ligji i dekriminalizimit, të mos kenë qenë anëtarë, bashkëpunëtorë ose të favorizuar nga Sigurimi i Shtetit përpara vitit 1990; të mos jenë bashkëpunëtorë, informatorë ose agjentë të asnjë shërbimi sekret. Po kështu kandidatët për kryeprokuror duhet të mos jenë dënuar më parë me vendim gjyqësor të formës së prerë për kryerjen e një vepre penale dhe të mos jenë larguar nga detyra për shkaqe disiplinore, si dhe të mos kenë masë disiplinore në fuqi. Ndërkohë në Kushtetutën e vendit përcaktohet se Prokurori i Përgjithshëm zgjidhet nga radhët e juristëve të spikatur, me jo më pak se 15 vjet përvojë pune, me integritet të lartë moral dhe profesional, që kanë përfunduar Shkollën e Magjistraturës ose kanë një gradë shkencore në drejtësi. Kandidati nuk duhet të ketë mbajtur funksione politike në administratën publike, ose pozicione drejtuese në parti politike gjatë 10 vjetëve të fundit përpara kandidimit.
Pas aplikimeve, Komisioni i Ligjeve do të zhvillojë seanca dëgjimore me të gjithë kandidatët dhe brenda dy ditësh pasi të ketë përfunduar dëgjesat, do të përgatitë raport për secilin kandidat drejtuar Seancës Plenare. Do të jetë kjo seancë që do të vendosë përmes votimit të zgjedhë kryeprokurorin e ri të përkohshëm, i cili do të ushtrojë detyrën deri në ngritjen e Këshillit të Lartë të Prokurorisë. Prokurori i përkohshëm duhet të emërohet brenda afatit 30- ditor. Në fillim të mbledhjes kryetari i komisionit, Ulsi Manja i kërkoi opozitës të bëjnë diskutim juridik dhe të lënë mënjanë emocionin politik. “Në kushtet e moskrijimit të KLP- së, Prokurori i Përgjithshëm zgjidhet në bazë të eksperiencës. Kuvendi cakton një nga prokurorët me më shumë eksperiencë", tha Manja. Ndërsa deputetët Alibeaj e Halimi të PD- së sqaruan qëndrimin e tyre, sipas të cilit duhet respektuar Kushtetuta. "Po tentoni të rrëmbeni kreun e akuzës", tha Alibeaj.