Trafiku i qenieve njerëzore, arrestohen në Kakavijë dy efektivë të policisë kufitare e ndihmësi i tyre
Korrupsioni, policët merrnin nga 300- 400 euro për person
GJIROKASTËR - Dy policë kufitarë në Kakavijë kanë rënë në pranga, pasi akuzohen se ndihmonin persona që të kalonin kufirin pa leje. SHÇBA ka arrestuar efektivët: Timo Ciko, 50 vjeç, shef i ruajtjes së kufirit të gjelbër në Drejtorinë e Policisë Kufitare Gjirokastër; Bledar Duçka, 43 vjeç, trup shërbimi për kufirin e gjelbër në Drejtorinë e Policisë Kufitare Gjirokastër dhe 41- vjeçarin Shpëtim Brakaj, 41 nga Fieri, i cili bënte rolin e ndihmësit. Këta persona u kapën gjatë operacionit të koduar "Green border", për dhënie ndihme për kalim të paligjshëm të kufirit, shpërdorim detyre dhe korrupsion pasiv. Mësohet se SHÇBA kishte regjistruar një procedim penal prej disa muajsh, mbi bazën e informacioneve që kishte siguruar për kalimin e shtetasve shqiptarë dhe të huaj, përmes kufirit të gjelbër drejt Greqisë në mënyrë ilegale. Pas një hetimi me metoda speciale, u bë e mundur të identifikohej dhe dokumentohej ky aktivitet kriminal. Mësohet se zyrtarët e policisë ndihmonin të kalonin kufirin persona, që e kishin të pamundur të udhëtonin në zonën Shengen për shkak të problemeve me afatet e shkelura kohore, apo mos përmbushjen e kushteve të kalimit të lirë, në këmbim të pagesave, që varionin nga 300 në 400 euro. Hetuesit e çështjes thanë se kundrejt pagesave që varionin nga 300 deri në 400 euro për çdo person, të siguruar nga Brakaj, punonjësit e policisë në vijën kufitare siguronin kushtet për të kaluar drejt vendit fqinj në mënyrë ilegale pa kryer procedurat ligjore. Gjatë arrestimit në flagrancë, të ndaluarve u janë sekuestruar një sasi euro, lekë, dollarë, telefona celularë dhe 1 automjet. Hetimi po vijon për zbulimin e personave të tjerë të implikuar.