Rama- Zaev: Ura për forcimin e miqësisë, bashkëjetesë mes dy komuniteteve
Kryeministrat takohen në Pustec, priten me këngë shqip dhe maqedonisht "Fëmijë i flasin mrekullisht të dyja gjuhët"
Kryeministri Edi Rama dhe kryeministri i Maqedonisë, Zoran Zaev, u takuan dje me komuniteti maqedonas në Pustec. Dy kryeministrat u përshëndetën ngrohtësisht nga banorët e Pustecit dhe autoritetet lokale. Ata vizituan shkollën e bashkuar ( 9- vjeçare dhe e mesme) të zonës, ku u kënduan disa këngë në dy gjuhë, shqip dhe maqedonisht. Kryeministri Rama theksoi rëndësinë që i kushtohet bashkëjetesës mes komuniteteve, si ura që forcojnë edhe miqësinë mes vendeve. "Besoj se është shumë domethënëse që ne jemi së bashku këtu, sot. Takimi me këtë komunitet nuk është thjesht një vizitë simbolike, por është edhe një mënyrë për të treguar për të gjithë opinionet tona publike në Shqipëri dhe Maqedoni, sesa shumë rëndësi, ne i japim kësaj bashkëjetese dhe sa e rëndësishme është që njësoj si këta fëmijë që i flasin mrekullisht të dyja gjuhët, edhe Shqipëria dhe Maqedonia të komunikojnë mrekullisht me njëratjetrën",- u shpreh kryeministri Rama. Kryeministri Zaev u shpreh i kënaqur të dëshmonte përdorimin e gjuhës maqedonase nga nxënësit. "Jam shumë i kënaqur që ndodhem sot, këtu në Pustec. Ne jemi mirëpritur nga banorët dhe patëm mundësinë të shikonim një performancë të shkëlqyer recitime në gjuhën maqedonase dhe atë shqiptare. Kjo tregon se gjuha maqedonase përdoret këtu dhe fëmijët e mësojnë atë. Shpresoj se gjuha maqedonase do të ushqehet këtu, natyrisht, në respekt të ligjeve në Shqipëri. Jam i kënaqur që sot jemi këtu, së bashku me kryeministrin Rama, të shohim këtë shkollë dhe të takohemi me autoritetet lokale, të diskutojmë problemet, me të cilat ata përballen dhe natyrisht, për të vazhduar marrëdhëniet me komunitetin maqedonas që jeton këtu në Pustec",- u shpreh kryeministri Zaev. Dy kryeministrat vizituan edhe kishën e Shën Mihalit. Ditën e premte u zhvillua në Pogradec mbledhja e përbashkët e dy qeverive të Shqipërisë dhe Maqedonisë. Në fjalën e tij kryeministri Edi Rama shprehu vendosmërinë e përbashkët të dy vendeve për të kontribuar në ndërtimin e një rajoni të ndërlidhur nga çdo pikëpamjes. "Ne i kemi rigjallëruar intensivisht kontaktet dhe marrëdhëniet. Përpos vizitave dhe takimeve të shumta dypalëshe që nga samiti i Triestes, takimi në Durrës me kryeministrat e Ballkanit Perëndimor, së fundmi ai në Sofje, kemi ndarë angazhimin dhe vendosmërinë për të kontribuar në ndërtimin e një rajoni të ndërlidhur nga pikëpamja ekonomike, infrastrukturore pa barriera të çfarëdollojshme në qarkullimin e kapitalit, të njerëzve dhe ideve. Besoj se për këto dhe shumë arsye të tjera ky takim mund të konsiderohet si një moment kyç në historinë tonë të përbashkët, për faktin se sot jemi këtu për të marrë një angazhim të përbashkët në ndërtimin e një mekanizmi të qëndrueshëm afatgjatë dhe për t'i ngritur marrëdhëniet mes dy vendeve me një stad të ri cilësor. Kjo kërkon një orientim të posaçëm strategjik, prandaj dhe axhenda e punës që kemi përcaktuar bashkërisht dhe që gjen shprehje në deklaratën e përbashkët, kanë qasje konkrete, përmbajtjesore dhe synon rezultate",- theksoi z. Rama. Ai foli për një pikë të përbashkët kalimi dhe dogane në kufirin e Qafë Thanës, përkrahjen e ndërsjellët për nxitjen e lehtësimit të import- eksportit mes palëve etj. Me rëndësi për Ramën është dhe modernizimi i infrastrukturës rrugore, hekurudhore dhe energjetike.